Matei 7

₁Na de pe kris, eta te na aves dino pe kris. ₂Ke von dena tumen pe kris krisasa sar tume dena kris, ai mezurina tumen sar tume mezurin. ₃Sostar dikhes tu o sulum kai si ande e jakh tjire phraleski, ai či dikhes tu e beli kai si ande tjiri jakh? ₄Vai sar tromas tu te phenes tjire phraleske: Muk ma te lav jekh sulum anda tjiri jakh, tu kai si tu jekh beli ande tjiri? ₅Athaitori, le mai angluno e beli anda tjiri jakh, ai atunči tu dikhesa sar te les o sulum anda e jakh tjire phraleski.

₆Na den le dieli svintsi ka le žiukel daratar ke ambolden pe ai šinen tumen, ai na šiuden tumare perli angla le bale, daratar ke inčaren le tela le punře.

₇Mangen, ai dena tumen; roden, ai tume arakhena; malaven, ai putrena tumenge. ₈Ke kon mangel lel, kon rodel arakhel, ai putren kudaleske kai malavel. ₉Savo anda tumende dela jekh bař ka pesko šiav, te mangela lestar manřo? ₁₀Vai, te mangela jekh mašio, dela les vo jekh sap? ₁₁T'avela kadia, nasul sar tume san, tume žianen te den laše dieli ka tumare šiave, sar mai but zurales tumaro Dad kai si ande o čeri dela vo mai laše dieli kudalenge kai mangen lestar.

₁₂Sa so tume kamen ke le manuš keren tumenge, keren sa kadia lenge, ke kudia si o zakono ai le profeturi.

₁₃Den andre katar o vudar tang. Ke buvlo si o vudar, bari si e vurma kai ningerel ka o xasarimos, ai but den andre kothar. ₁₄Numa tang si o vudar, kjidini si e vurma kai ningerel ka o traio, ai tsiřa si kai arakhen la.

₁₅Arakhen tume katar le falši profeturi. Von aven tumende ande le tsalia le bakrenge, numa andral si ruva bokhale. ₁₆Tume prinžiarena le ka lenge fruti. Kjidena tume struguro vai figi pe le kanře? ₁₇Sako lašio kopači del laše fruti, numa e čořo kopači del čoře fruti. ₁₈Jekh lašio kopači naštil te ninkerel čoře fruti, či jekh čořo kopači te ninkerel laše fruti. ₁₉Sako kopači kai či ninkerel laše fruti si šindi ai šiudini ande e jag. ₂₀Si kadia ke ka lenge fruti ke tume prinžiarena le.

₂₁Kudala kai phenen mange: Baria, Baria! či dena andre ande e amperetsia le čereski, numa kudo ferdi kai kerel so mangel muřo Dad kai si ande o čeri. ₂₂But phenena mange ande kudo dies: Baria, Baria, phendiam e Devleski vorba. Gonisardiam ame le demonon pa tjiro anav ai kerdiam ame but čudeni pa tjiro anav. ₂₃Atunči me phenava lenge vorta: Me šoha či prinžiardem tumen, žiantar mandar, tume kai či keren sar trubul.

₂₄Sa anda kudia, kon-godi ašunel kadala vorbi ai lel le opre, avela sar jekh manuš godiaver kai vazdias pesko kher pe jekh stanka. ₂₅O brišin pelo, le paia avile, le balvalia avile ai phurde pe kudo kher; vo či pelo tele, ke vo sas thodino pe e stanka. ₂₆Numa kon-godi ašunel kadala vorbi kai me phenav, ai či lel le opre, avela sar jekh manuš dilo kai vazdias pesko kher pe e kišai. ₂₇O brišin pelo, le paia avile, le balvalia phurde ai perade kudo kher; vo pelo tele, ai lesko phařaimos si baro.

₂₈Kana o Jesus getosardias pesko divano, o narodo sas lenge šodo so vo phenel: ₂₉Ke vo sikiarelas sar ke si les putiaria, ai na sar le zakonaria.