Matei 8

₁Kana o Jesus vulisto pa o plai, baro narodo gelo pala leste ₂Ai eta, jekh žiungalo nasvalo pašilo ai bangilo angla leste, ai phenel: Baria, te kamesa, tu šai vužares man.

₃O Jesus vazdias o vast, asbadias les, ai phenel: Me kamav, av vužio!

Strazo vo vužilo katar pesko nasvalimos. ₄Porme o Jesus phenel leske: Le tu sama te na phenes khanikaske; numa žia sikadio ka le raša le bare, ai de so o Moše phendiasas, eta von te dikhen.

₅Sar o Jesus avilo ande o Kapernaum, jekh fitsiri kai si baro pe šel ketani avel ai terdiarel les. ₆Řudjisarel les ai phenel: muři sluga sovel ande o kher, naštil te mai phirel ai dukhal les but.

₇O Jesus phenel leske: Žiava me, ai me sastiarava les.

₈O fitsiri del palpale: Baria, me či sim harniko ke tu t'aves ande muřo kher; numa phen ferdi jekh vorba, ai muři sluga avela sasti. ₉Ke, me kai sim tela le vast muře barenge, si ma ketani tela muřo vast, ai me phenav jekheske: Žia! ai vo žial; le kavreske: Aidi! ai vo avel; ai ka muři sluga: Ker kadia! ai vo kerel.

₁₀Kana ašundias les, sas šodo le Jesusoske, ai vo phenel kudalenge kai aven pala leste: Me phenav tumenge čačimasa, inke ande o Israel či arakhlem jekh kasavo baro patiamos. ₁₁Eta, me phenav tumenge ke but avena pa e rig e čači ai pa e rig e stingo, ai avena ka e skafidi ka o Abraham, o Isak ai o Jakob, ande e amperetsia le čereski. ₁₂Numa kudala kai trubul te aven le Devleske avena šiudine ande o tuniariko avri, kai rovena ai grintsina le dand.

₁₃Porme o Jesus phenel le fitsiri: Žia, t'avel tuke sar si tjiro patiamos.

Ai ande kudo časo leski sluga sastili.

₁₄O Jesus gelo atunči ande o kher le Petrosko, kai dikhlias leska sakra pe o pato ai si la tatimos. ₁₅Vo asbadias lako vast, ai o tatimos muklias la; porme voi uštili, ai služisardias les.

₁₆Riate, andine ka o Jesus but bengailen. Vo gonisardias le duxuri katar peski vorba, ai vo sastardias sa le nasvalimata. ₁₇Eta t'aresel so sas phendo katar o Esai, o profeto: Vo lias pe peste amare bangimata, ai vo lias pe peste amare nasvalimata.

₁₈O Jesus, dikhlias baro narodo krugom pestar, dias ordina te nakhen pe o kaver berego. ₁₉Jekh zakonari pašiol, ai phenel leske: Birevo, me žiava pala tute kai-godi kai tu žiasa.

₂₀O Jesus del les palpale: Le lisitsi si le groapi, ai le čiriklia ande o čeri si le kuiburi; numa o Šiav le manušesko nai les kai te hodinil pesko šero.

₂₁Jekh kaver, maškar le vortača, phenel leske: Baria, muk ma angla savořende te žiav t'angropov muře dades.

₂₂Numa o Jesus del les palpale: Av pala mande, ai muk le mulen te angropon le mulen.

₂₃Vo anklisto ande o čuno, ai leske vortača gele lesa. ₂₄Ai eta, uštilo pe e maria jekh pria baro tumano ke le talazuri šai tasavenas o čuno. Ai vo sovel. ₂₅Le vortača pašile paša leste, uštiaven les, ai phenen: Baria, skipisar ame, ame xasavas!

₂₆Vo phenel lenge: Sostar si tumenge dar?

Atunči vo uštilo, daravel le balvalia ai e maria, ai aresle muto. ₂₇Kudala manuš čudinisaile: Kon si kado, phenenas von, kas patian vi le balvalia ai e maria?

₂₈Kana aresle pe o kaver berego, ande o them le Gadarenengo, dui bengaile, ankliste avri anda le groapoševuri, avile angla leste. Von sas kadia bengeske ke khonik či tromalas te nakhen kothar. ₂₉Ai eta, von tsipin: So si maškar amende ai tute, Šiav le Devlesko? Avilian tu kathe te kjinuis ame mai angla e vramia?

₃₀Sas dur lendar but bale kai xanas. ₃₁Le demonuri řudjinas le Jesus: Te desa tu amen avri, trade ame anda kudala bale.

₃₂Vo phenel lenge: Žian!

Von ankliste, ai gele ande le bale. Ai eta, sa le bale šiude pe ande e maria, ai von xasaile ande le paia.

₃₃Kudala kai denas le te xan našle, ai gele ande o foro te phenen sa so nakhlias ai so areslias le bengailenge. ₃₄Atunči sa o foro anklisto angla o Jesus; ai, sar dikhle les, von řudjisaile leste te mukel lengi phuv.