Marko 6

₁O Jesus gelotar kothar, ai gelo ande pesko them. Leske vortača gele pala leste. ₂Kana o sabato areslo, vo thodias pe te sikiarel ande e khangeri židovitsko. But žene kai ašunenas leste sas lenge šodo ai phenenas: Katar aven leske kadala dieli? So si kadia godji kai si ande leste? Ai sar kasave čudeni kerdion pa leske vast? ₃Nai vo o kaštari, o šiav la Mariako, o phral le Jakobosko, le Josefosko, le Judesko ai le Simonosko? Ai leske pheia nai von maškar amende?

Ai kudia či patian pe ande leste.

₄Numa o Jesus phenel lenge: Jekh profeto vuřitsin les ande pesko them, maškar leske niamuri, ai ande lesko kher.

₅Vo naštisardias te kerel kothe či jekh čudenia, ke ferdi ke thodias le vast pe uni nasvale ai sastiardias le. ₆Ai leske sas šodo ke von či patian.

₇Atunči vo akhardias le deš-u-don, ai vo lias pe te tradel len dui pe dui, dias le putiaria pe le duxuri nasul. ₈Vo phendias lenge te na len pesa khanči pe o drom, ferdi jekh rovli; te ne avel len manřo, či gono, či love xurde ande e prastia; ₉te thon spargati pe le punře, ai te na len pe peste dui bundi. ₁₀Porme vo phenel lenge: Ande uni khera kai tume den andre, bešen kothe žikin tume či žian-tar kothar. ₁₁Ai, te si varekai žene kai či kamen t'aven tume lende ai či kamen t'ašunen tumende, žian-tar kothar, ai khosen le pulberia pa tumare punře eta te sikaven lenge. ₁₂Von geletar, ai von den duma te kein pe. ₁₃Von gonisarde but duxuri nasul, ai von thonas vuloi but pe le nasvale ai sastiarenas len.

₁₄O amperato Herodo ašundias so den duma pa o Jesus kai lesko anav areslo vestime, ai phenen: O Jono kai boldias živindisailo anda le mule, ai si anda kudia ke si lestar čudeni.

₁₅Le kaver phenenas: O Elia si.

Ai kaver phenenas: Si jekh profeto sar jekh anda le profeturi.

₁₆Numa o Herodo kai ašundias kudia, phenelas: O Jono si kai šindem lesko šero, vo si kai živindisailo.

₁₇Ke o Herodo vo korkořo phandadiasas le Jono, ai phanglias les ande e temnitsa, pala e Herodias, řomni katar o Filipo, lesko phral, ke vo lias la, ₁₈Ai ke o Jono phenelas leske: Nai tuke slobodo te les la řomnia tjire phraleski. ₁₉E Herodias xoliaili pe o Jono, ai kamelas te mudarel les. ₂₀Numa voi naštilas; ke o Herodo daralas katar o Jono, vo prinžiarelas ke vo si jekh manuš vorta ai svinto; vo lelas sama lestar. Ai, kana ašunelas leste, butivar sas leske šodo, ai vo ašunelas leste dragosa.

₂₁Numa, jekh dies baxtalo areslo, kana o Herodo, o prasniko katar o dies kai arakhadilo, dias jekh pativ peske barenge, le birevia pa jekh mii ketani ai ka le mai bare anda e Galilea. ₂₂E šei katar e Herodias avili ande e soba, khelel, ai kerdias veselo le Herodo ai leske goston. O amperato phenel la ternia šeiake: Mang mandar so tu kames, ai me dava les tuke.

₂₃Vo phendias kudia solaxasa: So tu mangesa mandar, me dava les tuke, makar t'avel dopaš muřo them.

₂₄Anklisti avri, voi phenel ka peski dei: So mangava me? Ai laki dei del palpale: O šero le Jonosko kai bolel.

₂₅Voi gribisaili te del andre karing o amperato, ai voi manglias lestar kadia: Me kamav te des ma akana, pe jekh tiari, o šero le Jonosko kai bolel.

₂₆O amperato nekežisailo, pala peski solax ai pala le gosti, či kamlias te del pe palpale. ₂₇Vo tradias pe kudia vramia jekhes kai arakhel, dias les ordina t'anel leske o šero katar o Jono kai boldias. O ketano gelo te šinel ande e temnitsa o šero katar o Jono kai boldias, ₂₈ai andias o šero pe jekh tiari. Vo dias les ka e terni šei, ai e terni šei dias les ka peski dei. ₂₉Le vortača le Jonoske, ašunde kudia, avile te len lesko stato, ai thode les ande jekh groapoševo.

₃₀Le apostoli, kjidinisaile paša o Jesus, phenen leske sogodi von kerde ai sogodi von sikiarde. ₃₁O Jesus phenel lenge: Aven rigate ande jekh than pusto, ai hodinisaras, jekh tsiřa. Ke sas but kai žian ai aven, ai len nas le inke e vramia te xan.

₃₂Von geletar kadia ande jekh čuno, te žian rigate ande jekh than pusto. ₃₃But žene dikhle ke žian-tar ai prinžiarde le, ai anda sa le foruri našle telal ai gele anglal ande o than kai von gele.

₃₄Kana von ankliste avri anda o čuno, o Jesus dikhlias jekh baro narodo, ai lias les mila lendar, ke von sas sar le bakroře kai nai len pastuřo; ai vo thodias pe te sikiarel le but dieli. ₃₅Sar o časo sas vuže posno, leske vortača pašile paša leste, ai phenenas: Kado than si pusto, ai o časo si vuže angle.

₃₆Trade len, eta te žian ande le kimpuri ai ande le gava krugom, te kjinen penge so te xan.

₃₇O Jesus del len palpale: Den le tume te xan. Numa von phenen leske: Žiasa ame te kjinas manřo pe dui šela dinari ai dasa le ame te xan?

₃₈Ai vo phenel lenge: Sode si tumen manřo? Žian te dikhen.

Von gele te dikhen, ai dine palpale: Panž, ai dui maše.

₃₉Atunči vo del len poronka te thon o narodo te bešen ande jekh than pe e čar zeleno, ₄₀Ai von bešle tele, ande řinduri pe jekh šel ai pe panž-var-deš. ₄₁Vo lias le panž manře ai le dui maše, ai vazdias le jakha karing o čeri, vo řudjisardias. Porme, vo phaglias o manřo, eta te den les ka o narodo. Vo vi mai huladias le dui maše maškar sa. ₄₂Sa xale ai pravardile, ₄₃ai andine deš-u-dui košnitsi pherde kotora manřo ai so ašilias anda le maše. ₄₄Kudala kai xale le manře sas panž mii žene.

₄₅Strazo pala kudia, thodias zor pe peske vortača t'anklen ande o čuno ai te nakhen angla savořende lestar pe e kaver rig, karing o Betsaida, žikin vo tradel o narodo palpale. ₄₆Kana vo tradias le, vo gelo pe o plai, te řudjil. ₄₇E riat avili, o čuno sas maškar e maria, ai o Jesus sas korkořo pe e phuv. ₄₈Vo dikhlias ke sas lenge trudno te spiden; ke e balval avelas pe lende. Angla savořende te uštel o dies, vo gelo karing lende, phirelas pe e maria, ai vo kamelas te nakhel le. ₄₉Kana von dikhle les ke vo phirel pe e maria, von gindisaile ke si jekh čoxano, ai von tsipin. ₅₀Kana von dikhenas les sa, von rimosaile. Strazo o Jesus del lensa duma, ai phenel lenge: Arakhen tume, me sim, te na daran!

₅₁Porme anklisto karing lende ande o čuno, ai e balval ašili. Lenge sas inke pria šodo ai pherdile dar; ₅₂ke von či hatiarde e čudenia le manřengi, ke lengo ilo sas zuralo.

₅₃Kana nakhle e maria, von avile ande o them katar o Genesaret, ai avile pe e phuv. ₅₄Kana ankliste avri anda o čuno, le žene strazo prinžiarde le Jesus. ₅₅Gele sa krugom, ai avile t'anen le nasvalen pe le paturi, kai-godi ašunenas ke vo sas. ₅₆Ande varesavo than kai vo areselas, ande le gava, ande le foruri vai ande le kimpuri, thonas le nasvalen pe le thana le foroske, ai řudjinas pe leste te muken len ferdi t'asban o gor leske tsalengo. Ai sa kudala kai asbanas les sas saste.