Marko 7

₁Le Farizianuri ai le zakonaria, avile anda o Jerusalem, kjidinisaile paša o Jesus. ₂Von dikhle ke uni anda leske vortača len pesko xamos le vastensa nai-vuže, sar te phenas, či xalade le.

₃[Eta, le Farizianuri ai sa le Židovuri či xanas bi te xalaven mišto penge vast, sar si o zakono le puranengo; ₄ai, kana von avile katar o than le forosko, von xanas ferdi kana vužionas. Len mai si le but kaver zakonuri kai len sama, sar te xalaven le taxta, le khore ai le kanti xarkumake ai le skamina.]

₅Ai le Farizianuri ai le zakonaria pušen les: Sostar tjire vortača či žian von pala o zakono le puranengo, numa len von pengo xamos le vastensa bi-vuže?

₆O Jesus del len palpale: Athaitoria, o Esai mišto phendias pe tumende, sar si ramome:

₉Vo mai phenel lenge: Tume mišto rimon le poronki le Devleske, te ninkeren tumare zakonuri. ₁₀Ke o Moše phendias: De pativ tjire dades ai tjira da; ai: Kudo kai dela armaia peske dades vai peska da, avela dino strafo te merel. ₁₁Numa tume, tume phenen: T'avela jekh manuš ke phenel peske dadeske vai peska dake: So sas ma t'ažutisarav tu si korban, si te phenas, jekh ke das ka o Del, ₁₂atunči tume muken les te či kerel khanči peske dadeske vai peska dake. ₁₃Šindian kadia tume e vorba le Devleski katar tumaro zakono, kai tume thodian. Ai tume keren but kaver dieli kadia.

₁₄Atunči, mai akhardias o narodo peste, vo phenel lenge:

Ašunen sa mande, ai hatiaren. ₁₅Nai khanči avrial o manuš, kai del ande leste, šai mahril les; numa so anklel avri anda o manuš, kudo si kai mahril. ₁₆T'avela varekon ke si les kan t'ašunel, ke t'ašunela.

₁₇Kana vo dias ande o kher, dur katar o narodo, leske vortača pušen les pa kudia paramiči. ₁₈Vo phenel lenge: Vi tume, tume san bi-godiake? Či hatiaren tume ke khanči so avel avrial kai del ande o manuš naštil te mahril les? ₁₉Ke či del kudo ande lesko ilo, numa ande lesko dji, porme žial ande le thana garade.

Kadia Jesus motholas ke sa le xamata vuže.

₂₀Vo mai phenel: So anklel avri anda o manuš, kudo si kai mahril le manušes. ₂₁Ke si andral, si anda o ilo le manušengo, ke anklen avri le nasul ginduri, le lažaimata, le čorimata, le mudarimata, ₂₂le kurvimata, le xanžalimata, le bengimata žiungalimaske, o athaimos kai diliarel, le žiungalimata, o dikhimos kai kamel te lel le kavrenge dieli, le barimata, o traio ande o dilimos. ₂₃Sa kudala dieli nasul anklen avri de andral, ai mahril le manušes.

₂₄O Jesus, gelotar kothar, gelotar ande e phuv katar e Tira. Vo dias andre ande jekh kher, kamlias te khonik te na žianel, numa naštisardias te bešel garado. ₂₅Ke jekh žiuvli, kai lias laka šeia jekh duxo nasul, ašundias pa leste, ai avili te šiudel pe ka leske punře. ₂₆Kudia žiuvli sas Grekaika, arakhadili ande e Fenitsia ande o them e Siria. Voi řudjisardias les te gonil le duxo nasul avri anda laki šei.

₂₇O Jesus phenel lake: Muk angla savořende le šiavořen te pravaren pe; ke nai mišto te len o manřo le šiavořengo, ai te šiuden les ka le tsinoře žiukel.

₂₈Ei, Baria, del les voi palpale, numa le tsinoře žiukel, tela e skafidi, xan le kotorořa katar le šiavoře.

₂₉Atunči vo phenel lake: Pala kadia vorba, žia, o duxo anklisto avri anda tjiri šei.

₃₀Ai, kana voi avili ande pesko kher, voi arakhlias la glata ke sovel pe o pato, o duxo gelo-tar avri.

₃₁O Jesus muklias e phuv katar e Tira, ai avel pa o Sidon karing e maria anda e Galilea, nakhelas pa o them le Deš Foruri. ₃₂Andine leske jekhe kašukes, kai sas leske trudno te del duma, ai řudjisarde les te thol pe leste le vast. ₃₃Vo lias les rigate dur katar o narodo, thodias leske le naia ande le kan, ai asbadias leski šib peske čungaresa. ₃₄Porme, vazdias le jakha pe o čeri, vo tsirdias pesko duxo, ai phenel: Effata, kudia bušol, puterdio!

₃₅Strazo leske kan puterdile, leski šib puterdili, ai vo delas duma pria mišto. ₃₆O Jesus phenel lenge te na phenen khanikaske; numa so vo mai but phenel lenge, so mai but den duma. ₃₇Von sas ande e pria bari čudenia, ai phenenas: Vo kerel sa sar mai šukar; ai inke kerel te ašunen le kašuke, ai te den duma le mutsi.