1Le Davidoske.
Muřo duxo svintsol le Bare Devles!
Ke sogodi kai si ande mande svintsol lesko svinto anav!
2Muřo duxo, svintsosar le Bare Devles,
Ai či buster či jekh anda leske mištimata!
3Vo si kai jertil sa tjire bezexa,
Kai sastiarel sa tjire nasvalimata;
4Vo Si kai ankalavel tjiro traio anda e hunia,
Kon thol pe tjiro šero e kurona le lašimaski ai la milaki;
5Vo si kai pravarel mištimasa tjiro purimos,
Kai terniarel tu, ašes sar jekh ulio.
6O Baro Del kerel kris,
Vo kerel zakono sa le prostonge.
7Vo sikadias peske vurmi ka o Moše,
Peske butia ka le šiave anda o Israel.
8O Baro Del si miloso ai lel sama,
Na gribisavo ka e xoli ai barvalo ka o mištimos;
9Vo či del palpale sakda,
Vo či garavel peski xoli pe sakda;
10Vo či kerel pe amende sar si amare bezexa,
Vo či kerel te pokjinas sar si amare bezexa.
11Numa kaiti si le čeri opral katar e phuv,
Kaiti lesko mištimos si baro kudalenge kai daran lestar;
12Kaiti pe e rig e čači si dur katar pe e rig e stingo,
Kaiti vo duriarel amendar amare šinimata.
13Sar jekh dad si leske mila anda peske šiave,
O Baro Del si leske mila anda kudala kai daran lestar.
14Ke vo žianel anda soste ame sam kerde,
Vo del pe godji ke ame sam kišai.
15O manuš! leske dies si sar e čar,
Vo sar e luludji le kimpongi.
16Kana jekh balval nakhel pa late, voi manai,
Ai o than kai voi sas či mai prinžiarel la.
17Numa o mištimos le Bare Devlesko žial pe sakda kudalenge kai daran lestar,
Ai leske mila pe le šiave lenge šiavenge,
18Kudalenge kai arakhen leski patia,
Ai den pe godji ka leske poronki eta te keren pe lende.
19O Baro Del thodias pesko skamin amperatisko anda le čeri,
Ai leski amperetsia si bari pe sa le dieli.
20Svintson le Bare Devles, tume leske andželuri,
Kai san zurale ande e zor, ai kai keren leske ordini,
Patian ka lesko hango la vorbako!
21Svintson le Bare Devles, tume sa leske armi,
Kai san leske služi, ai kai keren sar vo kamel!
22Svintson le Bare Devles, tume sa leske butia,
Ande sa le thana kai vo si baro!
Muřo duxo, svintsosar le Bare Devles!
