1Muřo duxo, svintsosar le Bare Devles!
Baro Del, muřo Del, tu san pria baro!
Pe tute si o strefiaimos ai o šukarimos!
2Vo thol pe peste vedaria sar jekh bunda;
Vo buxiarel le čeri sar jekh tseřa.
3Vo kerel le paiensa so si t'avel lesko kher;
Vo lel le nuveria sar t'avel lesko vurdon,
Vo žial pe le phaka la balvaliake.
4Vo kerel peske andželon sar balvalia,
Ai peske služi sar pařa la jagake.
5Vo thodias e phuv pe o zuralimos,
Ai voi šoha či miškila.
6Tu pherdian e phuv la mariasa sar jekh tsolosa,
Le paia terdion pe le plaia;
7Von našle angla e dar,
Von šiude pe ka o hango tjire řondietosko.
8Plaia uštile, le dolini telile,
Ande o than kai tu thodian lenge.
9Tu thodian jekh gor kai le paia te na nakhen
Eta te na mai pheren e phuv.
10Vo ningerdias le paia katar vulel,
Kai vulen maškar le plaia.
11Von pravaren sa le žigenien le kimponge;
Le magaria sirbati pen pengi truš.
12Le čiriklia anda o čeri bešen pe lenge bereguri,
Von keren t'ašundiol lengo hango maškar le kaštoře.
13Pa opral kai bešel, vo kingiarel le plaia;
E phuv čaili la frutensa katar tjiri butji;
14Vo kerel te bariol e čar le žigenienge,
Ai le planti so trubul le manušes,
Eta ke te e phuv te del pesko xamos,
15E mol kai veselil o ilo le manušesko,
Ai kerel mai but sar o vuloi te strefial lesko mui,
Ai o manřo kai ninkerel o ilo le manušesko.
16Le kopačia le Bare Devleske pherdion,
Le tsedruri anda o Libano, kai vo thodias.
17Kothe le čiriklia thode penge kuiburi;
E čirikli bari si kai bešel ande le sipruri,
18Le plaia opre si le buznia sirbati
Le bař si kai garadion le šošoia.
19Vo kerdias o šiunuto te gjinen e vramia;
O kham žianel kana si te perel.
20Tu anes le tuniariči, ai si riat:
Atunči sa le žigeni le vešeske miškin pe;
21Le lionutsuri tsipin pala so si te xan,
Ai mangel katar o Del pengo xamos.
220 kham uštel: von žiantar,
Ai von soven ande penge groapi.
23O manuš anklel avri te žial ka peski butji,
Ai ka peski butji, ži e riate.
24Ke te tjire butia si pria bare, o Baro Del!
Tu sa kerdian le godiasa.
E phuv la pherdi tjire mištimasa.
25Eta e bari ai lungo maria:
Kothe naion bi gjinde
Žigeni tsinoře ai bare;
26Kothe phiraven pe le čunuri,
Ai kudo smovo la mariako kai tu kerdian te khelel pe ande le talazuri.
27Sa kudala žigeni ažiukeren ande tute,
Te des len lengo xamos pe vramia.
28Tu dian le, ai von line le;
Tu putres tjiro vast, ai von pravaren mištimasa.
29Tu garaves tjiri fatsa: von isdran;
Tu les anda lende o phurdimos: von xain,
Ai von žian palpale ande pengi kišai.
30Tu trades tjiro phurdimos: von si kerde,
Ai tu neviares e fatsa la phuviaki.
31Ke o vestimos le Bare Devlesko bešel pe sakda!
Ke o Baro Del te veselil pe anda peske butia!
32Vo dikhel e phuv, ai voi isdral;
Vo asbal le plaia, ai von thuvavon.
33Me gjilabava le Bare Devles sogodi traiva.
Me vestiva muře Devles sogodi avava živindo.
34Ke muře vorbi t'avel leske drago!
Me kamav te veseli ma ande o Baro Del.
35Ke te le bezexale bilan pa e phuv,
Ai ke te le nasul te na mai aven!
Muřo duxo, svintsosar le Bare Devles!
Luvudin le Bare Devles!
