1Luvudin le Bare Devles, ke vo si lašio,
Ke leski mila žial pe sakda!
2Ke o Israel te phenel:
Ke leski mila žial pe sakda!
3Ke o kher katar o Aron te phenel;
Ke leski mila žial pe sakda!
4Ke sa kudala kai daran le Bare Devles phenen:
Ke leski mila žial pe sakda!
5Anda o peř la darako me akharav le Bare Devles:
O Baro Del kerel pe muři, muklias ma.
6O Baro Del si mange, nai mange khanči dar:
So šai keren mange jekh manuš?
7O Baro Del si kai ažutil ma,
Ai me veseli ma kai dikhav muře dušmanon.
8Mai mišto te rodes jekh garaimos ande o Baro Del
Ke te des tu ka o manuš;
9Mai mišto te rodes jekh garaimos ande o Baro Del
Ke te des tu ka le bare.
10Sa le thema terdion krugom ma:
Ande o anav le Bare Devlesko, šinav le kotora.
11Von terdion krugom ma sar le birovlia:
Ande o anav le Bare Devlesko, šinav le kotora.
12Von terdion krugom ma, kjiden ma:
Von meren sar jekh jag kanřengi;
Ande o anav le Bare Devlesko, šinav le kotora.
13Tu spidesas ma te perav;
Numa o Baro Del ažutisardias ma.
14O Baro Del si muři zor ai e diela muře luvudimaski;
Vo si kai skipisardias ma.
15Tsipimata nirimaske ai skipimaske vazden pe ande le tseři le vortonge:
O čačimos le Bare Devlesko sikavel peski zor!
16O čačimos le Bare Devlesko si vazdino!
O čačimos le Bare Devlesko sikavel peski zor!
17Me či merava, me traiva,
Ai me phenava le butia katar o Baro Del.
18O Baro Del mardias ma,
Numa či dias ma ka o merimos.
19Puter mange le vudara tjira krisake:
Me dava andre, me luvudiva le Bare Devles.
20Eta o vudar le Baro Devlesko:
Lestar den andre le vorta.
21Me luvudiv tu, ke tu kerdian pe muři,
Ke tu skipisardian ma.
22O bař kai šiude kudala kai vazden khera
areslo o mai lašio ande o koltso;
23Si katar o Baro ke kudia avilo,
ai si jekh čudenia ka amare jakha.
24Kathe si o dies kai o Bare Del kerdias:
T'avel vo amenge jekh diela veselimaski ai veselo!
25O Baro Del, de o skipimos!
O Baro Del, de o barvalimos!
26Svintsime t'avel kudo kai avel ande o anav le Bare Devlesko!
Ame svintsosaras tu anda o kher le Bare Devlesko.
27O Baro Del si Del, ai vo del ame e strefiaria.
Phanden le šinades le šelensa,
Anen les ži ka le šinga le altaroski!
28Tu san muřo Del, ai me luvudiva tu;
Muřo Del! Bariarava tu.
29Luvudin le Bare Devles, ke vo si lašio,
Ke leski mila žial pe sakda!
