1Veseli kudala kai si sa ande pengi vurma,
Kai phiren sar si o zakono le Bare Devlesko!
2Veseli kudala kai arakhen so phenel,
Kai roden les ande sa pengo ilo,
3Kai či keren bezex,
Ai kai phiren ande leske vurmi!
4Tu thodias tjire ordini,
Te len le mišto opre.
5Sar te žiav mai mišto tusa,
Eta te lav sama tjire zakonuri!
6Atunči či loliovav,
Kana dikhav tjire poronki.
7Me luvudiva tu ande o čačimos muře ilesko,
Sikiovava le zakoni tjira krisake.
8Me kamav te garavav tjire zakonuri:
Na muk ma sa!
9Sar o terno murš kerela vuži peski vurmitsa?
Kai žial pala tjiri vorba.
10Me rodav tu ande sa muřo ilo:
Na muk ma te xasavav dur katar tjire poronki!
11Me kjidav tjiri vorba ande muřo ilo,
Eta te na kerav bezex pe tute.
12Svintsime t'aves, o Baro Del!
Sikiar ma tjire zakonuri!
13Anda muře vuš gjinav
Sogodi phenes anda tjiro mui.
14Me veseli ma kai žiav pala tjire zakonuri,
Sar t'aven ma sa le mandjinata.
15Me dav ma godji pe tjire ordini,
Si tjire vurmitsi angla muřo ilo.
16Me kerav muře dragosti anda tjire zakonuri,
Me či bustrav tjiri vorba.
17Ker mišto tjira slugake, te traiv
Ai ke te lav sama tjiri vorba!
18Puter muře jakha, te dikhav pe tute
O šukar tjiro zakono!
19Me sim streino pe e phuv:
Na garav mandar tjire poronki!
20Muřo duxo si phago katar so me kamav
Kai sakda žial karing tjire zakonuri.
21Tu daraves le barimatange, kudala armandine,
Kai den rigate katar tjire poronki.
22Le pa mande o pharimos ai e vuřitsia!
Ke me lav sama katar tjire zakonuri.
23Makar ke le prinsuri bešen ai den duma pe mande,
Tjiri sluga del pe godji ka tjire zakonuri.
24Gugle mange tjire poronki,
Von sikiaren ma.
25Muřo duxo lo astardo ka e kišai:
De ma o traio sar si tjiri vorba!
26Me phenav muře vurmi, ai tu keres pe muři:
Sikiar ma tjire zakonuri!
27Ker ma te žianav e vurma tjire poronkongi,
Ai me dava ma godji ka tjire šukarimata!
28Muřo duxo rovel ande o nekazo:
Uštiav ma sar si tjiri vorba!
29Duriar mandar e vurma le nasuleski,
Ai de ma o mištimos te žiav pala tjiro zakono!
30Me alosardem e vurma le čačimaski,
Me thav tjiri zakonuri angla muře jakha.
31Me astardiov ka tjire zakonuri;
Baro Del, na ker te perav!
32Me našav ande e vurma tjire poronkongi,
Ke tu buvliares muřo ilo.
33Sikiar ma, Baro Del, e vurma tjire zakonongi,
Te ninkerav le žikai či getol pe!
34De ma e godji, te garavav tjiro zakono
Ai ke te lav les sama ande sa muřo ilo!
35Ninger ma ande e vurmitsa tjire poronkongi!
Ke me kamav len.
36Bangiar muřo ilo karing tjire poronki,
Ai na karing o nirimos!
37De muře jakha rigate te na dikhav le dieli intaino,
Ker te traiv ande tjiri vurma!
38Ker karing tjiri sluga so tu phendian.
Kai si kudalenge kai daran tutar!
39Duriar mandar o lažiamos kastar darav!
Ke tjire krisa si pherde mištimata.
40Eta, kamav te kerav tjire ordini:
Ker te traiv ande tjiri kris!
41Baro Del, ke tjiri mila t'avel pe mande,
Tjiro skipimos sar tu phendian!
42Ai šai dava anglal kudales kai prasal ma,
Ke me dav ma ka tjiri vorba.
43Na le anda muřo mui sa e vorba le čačimaski!
Ke me ažiukerav ande tjire krisa.
44Me arakhava tjiro zakono sa anda jekh,
Pe sakda ai sogodi avela.
45Me phirava dural,
Ke me rodav tjire ordini.
46Me dava duma pala tjire zakonuri angla le amperatsi,
Ai či loliovava.
47Kerava muře guglimata anda tjire poronki,
Me kamav le.
48Me vazdav muře vast karing tjire poronki kai me kamav,
Ai kamav te dav ma godji ka tjire poronki.
49De tu godji so tu phendian tjira slugake,
Ke tu dian ma t'ažiukerav!
50Kadia si te milui ma ande muřo čořimos,
Ke so tu phendian mange del ma o traio.
51Le barimatange thon pe mande asaimos;
Či dav ma rigate katar tjiro zakono.
52Dav ma godji ka tjire krisa kai sas angla savořende, o Baro Del!
Ai mišto mange.
53Jekh xoli phabardi lel ma kana dikhav le nasulen
Kai muken o zakono.
54Tjire zakonuri me kerav gjili anda lende,
Ande o kher kai me sim streino.
55Riate me dav ma godji ka tjiro anav, o Baro Del!
Ai me arakhav tjiro zakono.
56Kudo si te avel muřo,
Ke me lav sama tjire ordini.
57Muři partia, o Baro Del! phenav la,
Si t'arakhav tjire vorbi.
58Me mangav tu anda sa muřo ilo:
Avel tuke mila mandar, sar tu phendian!
59Me dav ma gindo ka muře vurmi,
Ai me ningerav muře pasuri karing tjire zakonuri.
60Gribiv ma, či dav rigate
Te lav sama tjire poronki.
61Le kletki le nasulenge terdion krugom ma;
Me či bustrav tjiro zakono.
62Maškar e riat me uštiav te luvudiv tu,
Pala le krisa tjira krisako.
63Me sim o vortako sa kudalenge kai daran tutar,
Ai kudalengo kai arakhen tjire ordini.
64E phuv, o Baro Del! si pherdi katar tjiro mištimos;
Sikiar ma tjire zakonuri!
65Tu keres mištimos tjira slugake,
O Baro Del! sar tu phendian.
66Sikiar ma o mištimos ai e godji!
Ke me patiav ka tjire poronki.
67Angla savořende t'avav kovlo, šibivas ma;
Akana lav sama tjiri vorba.
68Tu san lašio ai lašimasko;
Sikiar ma tjire zakonuri!
69Barimatange den pe godji pe mande te xoxaven;
Me, arakhav anda sa muřo ilo tjire ordini.
70O ilo si kovlo sar o čiken;
Me, si mange drago tjiro zakono.
71Si mišto t'avav prosto,
Eta te sikiuvav tjire zakonuri.
72Mai mišto mange o zakono anda tjiro mui
Ke sar jekh mii dieli sunakune ai rupune.
73Tjire vast kerde ma, von lašiarde ma;
De ma e godji, te sikiuvav tjire poronki!
74Kudala kai daran tutar dikhen ma ai veselin pe,
Ke me ažiukerav ande so tu phendian.
75Tu žianes, o Baro Del! ke tjire krisa si vorta;
Si katar o čačimos ke tu perardian ma.
76Ke tjiro mištimos miluil ma,
Ke tu phendian les tjira slugake!
77Ke te tjire lašimata aven pe mande, te traiv!
Ke tjiro zakono si mange guglo.
78Ke t'aven tele, le barimatange kai phariaren pe mande intaino!
Me, dav ma godji ka tjire ordini.
79Ke t'aven mande, kudala kai daran tutar,
Ai kudala kai žianen tjire poronki!
80Ke muřo ilo t'avel vorta ande tjire zakonuri,
Eta te na avav pherdo lažiav!
81Muřo duxo nekežil pala tjiro skipimos;
Me ažiukerav so tu phendian.
82Muře jakha ažiukeren pala so tu phendian;
Me phenav: Kana řesgisa ma tu?
83Ke me sim sar jekh bočonko ande o thuv;
Me či bustrav tjire poronki.
84Sode diesa si tjira sluga?
Kana keresa tu kris pe kudala kai mesain pe mande?
85Barimatange hunaven groapi angla mande;
Von či kerel sar si tjiro zakono.
86Sa tjire poronki si ferdi čačimos;
Von amin pe mande intaino: ažutisar ma!
87Von tromanas te peraven ma ai bilaven ma;
Ai me, me či mukav tjire ordini.
88De ma o traio sar si tjiro mištimos,
Eta te lav sama le poronki katar tjiro mui!
89Pe sakda, o Baro Del!
Tjiri vorba bešel ande le čeri.
90Vitsa vitsatar tjire čačimos ašel;
Tu kerdian e phuv, ai voi bešel zurali.
91Si pala tjire zakonuri ke sa si adies,
Ke sako dieli si tela tjiro vast.
92Te tjiro zakono te na avilinosas mange guglo,
Atunči sas t'avav xasardo ande muřo čořimos.
93Či bustrava šoha tjire ordini,
Ke lendar tu des ma o traio.
94Me sim tjiro: skipisar ma!
Ke me rodav tjire ordini.
95Le nasul ažiukeren ma te xasaren ma;
Me mišto lav sama katar tjire poronki.
96Me dikhav semnuri ka sogodi kai si mišto:
Tjire poronki nai le gora.
97Sode si mange drago tjiro zakono!
Vo si sako dies kai dav ma godji leste.
98Tjire poronki keren anda mande mai godiaver sar muře dušmaia,
Ke von sako dies si mansa.
99Me sim mai sikiardo sar sa muře birevia,
Ke tjire poronki si kai dav ma godji lende.
100Man si mai but godji sar le phuren,
Ke me lav sama tjire ordini.
101Me ninkerav muřo punřo dur katar e nasul vurma.
Eta t'arakhav tjiri vorba.
102Me či dav ma rigate katar tjire zakonuri,
Ke tu san kai sikiares ma.
103Ke sar tjire vorbi si gugle ka muřo taloi,
Mai but sar o avdjin ka muřo mui!
104Katar tjire ordini kerdiovav mai godiaver,
Kadia vuřitsiv sako vurma xoxamni.
105Tjiri vorba si jekh lampo ka muře punře,
Ai jekh vedaria pe muři vurmitsa.
106Me solaxav, ai me ninkerava,
Te lav sama le zakonuri tjira krisake.
107Me sim mišto dino pe o lažiav;
Baro Del, de ma o traio sar si tjiri vorba!
108Le, o Baro Del! so muřo mui phenel,
Sikiar ma tjire zakonuri!
109Muřo traio si sakda thodo,
Ai me či xasavav dur katar tjire ordini.
110Le nasul thon mange kletki,
Ai me či xasavav dur katar tjire ordini.
111Tjire poronki si pe sakda so si muřo,
Ke von si e veselia ande muřo ilo.
112Me bangiarav muřo ilo te kerel pe tjire poronki,
Sakda, ži kai avela gata.
113Vuřitsiv le manušen kai diliaren pe,
Ai me kamav tjiro zakono.
114Tu san muřo garaimos ai muřo fedevo;
Me ažiukerav ande so tu phendian.
115Durion mandar, le nasul,
Eta te lav sama le poronki muře Devleske!
116Ninker ma sar tu phendian, eta te traiv,
Ai na ker te perav ande so ažiukerav!
117Av pe kaste bešav, t'avav skipime,
Ai te lav sama bi terdimasko katar tjire poronki!
118Tu vuřitsis sa kudalen kai den pe rigate katar tjire poronki,
Ke lengo athaimos či kerel khanči.
119Tu les sar e spuma sa la nasulen pa e phuv;
Sa anda kudia drago mange tjire poronki.
120Muřo mas isdral katar e dar kai si ma tutar,
Ai darav katar tjire krisa.
121Me lav sama o zakono ai e kris:
Na muk ma ka muře dušmaia!
122Le te garaves tu o mištimos katar tjiri sluga,
Na muk te den pa mande opral le barimatange!
123Muře jakha nekežin pala tjiro skipimos,
Ai pala e kris kai phendian.
124Ker karing tjiri sluga sar si tjiro mištimos,
Ai sikiar ma tjire poronki!
125Me sim tjiri sluga: de ma e godji,
Te žianav tjire zakonuri!
126Avili e vramia ke o Baro Del šai kerel jekh diela:
Von šinen tjiro zakono.
127Sa anda kudia drago mange tjire poronki,
Mai but sar o sunakai ai sar o sunakai sano;
128Sa anda kudia me arakhav vorta tjire ordini,
Me vuřitsiv sa e vurma le xoxaimaski.
129Tjire poronki si drago:
Kadia muřo duxo lel sama lendar.
130So sikaven tjire vorbi strefian,
Von den godji le proston.
131Me putrav o mui ai me phurdav zurales,
Ke me kamav pala tjire poronki.
132Ambolde karing mande tjiri fatsa, ai t'avel tuke mila mandar,
Sar si tjiro zakono karing kudala kai kamen tjiro anav!
133Zuriar muře pasuri ande tjiri vorba,
Ai na muk či jekh bezex t'avel baro pe mande!
134Skipisar ma katar o pharimos le manušengo,
Eta t'arakhav tjire ordini!
135Ker te strefial tjiri fatsa pe tjiri sluga,
Sikiar ma tjire zakonuri!
136Bare paia peren anda muře jakha,
Ke von či len sama tjiro zakono.
137Tu san vorta, o Baro Del!
Ai tjire krisa si vorta;
138Tu thos zakonuri pe e kris
Ai pe o mai baro čačimos.
139Muřo patiamos phabarel ma,
Ke muře dušmaia bustren tjire vorbi.
140Tjiri vorba si sa zumadi,
Ai tjiri sluga kamel la.
141Me sim tsinořo ai šiudino;
Me či bustrav tjire ordini.
142Tjiri kris si kris pe sakda,
Ai tjiro zakono si o čačimos.
143E dar ai o nekazo astaren ma;
Tjire poronki si muře guglimata.
144Tjire zakonuri si sakda vorta:
De ma e godji te traiv!
145Me akharav tu ande sa muřo ilo: ker pe muři, Baro Del,
Eta te lav sama tjire zakonuri!
146Me akharav tu: skipisar ma,
Eta te lav sama tjire zakonuri!
147Me uštiav mai angla o dies ai me tsipiv;
Me ažiukerav ande so tu phendian.
148Angla te perel e riat tele me žiangliovav ai me putrav le jakha,
Te dav ma godji ka tjiri vorba.
149Ašun muřo hango ando tjiro mištimos!
De ma o traio ande tjiri kris!
150Von pašion, kudala kai keren pala o marimos
Von durion katar o zakono.
151Tu san paše, o Baro Del!
Ai sa tjire poronki si o čačimos.
152De dumult žianav katar tjire zakonuri
Ke tu thodian le pe sakda.
153Dikh muřo čořimos, ai skipisar ma!
Ke me či bustrav tjiro zakono.
154De duma anda mande, ai skipisar ma;
De ma o traio sar tu phendian!
155O skipimos si dur katar le nasul,
Ke von či roden tjire zakonuri.
156Tjire mištimata si bare, o Baro Del!
De ma o traio ande tjire krisa!
157Kai roden te maren ma ai muře dušmaia si but;
Me či dava ma rigate katar tjire zakonuri.
158Me dikhav griatsasa le bi laše,
Kai či len sama tjiri vorba.
159De tu godji ke mange drago tjire ordini:
Baro Del, de ma o traio ando tjiro mištimos!
160Sa tjiri vorba bešel pe o čačimos,
Ai sa le zakonuri tjira krisake si pe sakda.
161Prinsuria amin pe mande intaino;
Muřo ilo isdral ferdi ka tjire vorbi.
162Me veseli ma ka tjiri vorba,
Sar kuda kai arakhel jekh baro mandjin.
163Me vuřitsiv, mange nai drago o xoxaimos
Me kamav tjiro zakono.
164Eftavar ande o dies vestiv tu,
Pala le zakonuri tjira krisake.
165Si but patia kudalenge kai si lenge drago tjiri kris,
Ai či avel pe lende či jekh nasulimos.
166Me ažiukerav ande tjiro skipimos, o Baro Del!
Ai me kerav tjire poronki.
167Muřo duxo lel sama tjire zakonuri,
Ai me kamav le but.
168Me lav sama tjire ordini ai tjire zakonuri,
Ke sa muře vurmi si angla tute.
169Ke muřo tsipimos aresel ži tute, o Baro Del!
De ma e godji, sar tu phendian!
170Ke muře vatimata t'aresen ži tute!
Skipisar ma, sar tu phendian!
171Ke te muře vuš phenen tjiro luvudimos!
Ke tu sikiares ma tjire zakonuri.
172Ke muři šib gjilabel tjiri vorba!
Ke sa tjire poronki si vorta.
173Ke tjiro vast t'avel t'ažutil ma!
Ke me alosardem tjire ordini.
174Me nekeživ pala tjiro skipimos, o Baro Del!
Ai tjiro zakono perel mange drago.
175Ke muřo duxo te trail ai ke te luvudil tu!
Ai ke te tjire krisa te ninkeren ma!
176Me sim xasardo sar jekh bakrioři xasardi: rode tjira sluga,
Ke me či bustrav tjire poronki.
