1Luvudin le Bare Devles!
Muřo duxo, luvudisar o Baro Del!
2Me luvudiva le Bare Devles sogodi traiva,
Me vestiva muře Devles sogodi avava.
3Na den tume ka le bare,
Ka le šiave le manušesko, kai naštin te skipin.
4Lengo phurdimos žialtar, von žian ande e phuv,
Ai sa kudo dies so von kamle xasavon.
5Veselo kudo kai si les skipimos katar o Del le Jakobosko,
Kai thol pesko patiamos ande o Baro Del, pesko Del!
6Vo kerdias le čeri ai e phuv,
E maria ai sa so si andre.
Vo garavel o čačimos pe sakda.
7Vo kerel kris sar mangen le čoře;
Vo del manřo ka le bokhale;
Ai o Baro Del skipil le phanglen;
8O Baro Del putrel le jakha le kořenge;
O Baro Del vortol kudala kai si bange;
O Baro Del drago leske le votra.
9O Baro Del lel sama katar le streia,
Vo ninkerel le baiastrukos ai le phivlia,
Numa del muial e vurma le nasulengi.
10O Baro Del amperetsil pe sakda;
Tjiro Del, o Sion! bešela berš beršesa!
Luvudin le Bare Devles!
