Psalmo 145

Me bariarava tu, o muřo Del, muřo amperato!

Ai me svintsova tjiro anav pe sakda ai sogodi avela.

₂Sako dies svintsova tu,

Ai me vestiva tjiro anav pe sakda ai sogodi avela.

₃O Baro Del si baro ai trubul te luvudin les,

Ai lesko barimos naštin te zumaven les.

₄Ke sako vitsa te vestil tjire butia,

Ai te phenel tjire bare dieli!

₅Me phenava o šukar vestimos tjira amperetsiako;

Me gjilabava tjire šukarimata.

₆Dena duma pa tjiri zor darani,

Ai me phenava tjiro barimos.

₇Ke te phenen o gindo katar tjiro baro mištimos,

Ai ke te vestin tjiri kris!

₈O Baro Del si miloso ai dragosto,

Kovlo ka e xoli ai pherdo mištimos.

₉O Baro Del si lašio karing savořende,

Ai leski dragostia butiol pe sa leske butia.

₁₀Sa tjire butia luvudin tu, o Baro Del!

Ai tjire čače svintsona tu.

₁₁Von phenena o vestimos tjira amperetsiako,

Ai von phenena tjiri zor,

₁₂Te keren te žianen ka le šiave le manušeske tjiri zor

Ai o šukar barimos tjira amperetsiako.

₁₃Tjiri amperetsia si jekh amperetsia pe sa le berša,

Ai tjiri zor bešela ande sa le berša.

₁₄O Baro Del ninkerel sa kudalen kai peren,

Ai vo vortol sa kudalen kai si bange.

₁₅Le jakha savořenge ažiukeren ande tute,

Ai tu des le o xamos ande lengi vramia.

₁₆Tu putres tjiro vast,

Ai tu pravares sa von kamen sogodi si kai train.

₁₇O Baro Del si vorta ande sa peske vurmi,

Ai miloso ande sa peske butia;

₁₈O Baro Del si paša sa kudala kai akharen les,

Ka kudala sa kai akharen les čačimasa;

₁₉Vo kerel pe kudalenge kai daran lestar,

Vo ašunel lengo tsipimos ai vo skipil le.

₂₀O Baro Del arakhel sa kudalen kai kamen les,

Ai vo phařavel sa le nasulen.

₂₁Ke muřo mui phenel o luvudimos le Bare Devlesko,

Ai ke sako mas svintsol lesko svinto anav.

Pe sakda ai sogodi avela!