Psalmo 38

₂Baro Del! na ker te pokjinav ande tjiri xoli,

Ai na mar ma kana san xoliariko.

₃Ke tjire sulitsi astarde ma,

Ai tjiro vast pharilo pe mande.

₄Nai khanči svinto ande muřo stato pala tjiri xoli,

Manai zor ande muře kokala pala muři bezex.

₅Ke muře bezexa ušten opral pa muřo šero;

Sar jekh pharo thodimos, von si pria phare mange.

₆Muře šindimata si rimome ai khanden,

Katar muřo dilimos.

₇Me sim perado, mai mai paluno tele;

Sa o dies phirav ande o nekazo.

₈Ke jekh dukh phabardi xal muře pořa,

Ai nai khanči lašio ande muřo mas.

₉Me sim bi zorako, sa phago;

E dukh muře ileski ankalavel mandar vatimata.

₁₀Baria! sogodi me kamav si angla tute,

Ai muře suspirimata nai tutar garade.

₁₁Muřo ilo si miškil, muři zor mukel ma,

Ai e vedaria muře jakhengi nai inke mansa.

₁₂Muře vortača ai kudala kai žianen ma durion katar muři dukh,

Ai kon si mandar paše den pe rigate.

₁₃Kudala kai kamen muřo traio lašiaren penge kletki;

Kudala kai roden muřo nasulimos phenen xoxaimos,

Ai von den pe godji sako dies athaimata.

₁₄Ai me, me sim sar jekh kašuko, či ašunav;

Me sim sar jekh muto, kai či putrel o mui.

₁₅Me sim sar jekh manuš kai či ašunel.

Ai naštil te del palpale či jekh fialo.

₁₆Baro Del! ande tute ažiukerav;

Tu desa palpale, Baria, muřo Del!

₁₇Ke me phenav: Na muk te veselin pe pala mande,

Ke t'ušten pe mande, te muřo punřo miškila!

₁₈Ke me ašiav te perav,

Ai muři dukh si sakda angla mande.

₁₉Ke me prinžiarav muřo lažiav,

Me sim ande e dar pala muři bezex.

₂₀Ai muře dušmaia si pherde traio, pherde zor;

Kudala kai vuřitsin ma intaino si but.

₂₁Von den ma nasulimos pala mištimos;

Von si pe mande, ke me rodav o mištimos.

₂₂Na muk ma, Baro Del!

Muřo Del, na av dur mandar!

₂₃Av sigo t'ažutisares ma,

Baria, muřo skipitori!