1Ka o birevo kudalengo kai gjilaben, Psalmo le Davidoske.
2Veselo kudo kai lel sama katar le čoře!
O dies o nasul o Baro Del skipil les;
3O Baro Del arakhel les ai lel sama katar lesko traio. Vo si veselo pe e phuv,
Ai tu či des le t'avel drago lenge dušmanonge.
4O Baro Del ninkerel les pe lesko than dukhako;
Tu ažutis le ande sa lenge nasvalimata.
5Me phenav: Baro Del, t'avel tuke mila mandar!
Sastiar muřo duxo! ke me kerdem bezex pe tute.
6Muře dušmaia phenen nasulimasa pe mande:
Kana merela vo? Kana xasavola lesko anav?
7T'avela varekon te dikhel ma, vo lel jekh šib falšo,
Vo kjidel san te del duma nasul;
Vo žialtar, ai vo del duma avri.
8Sa muře dušmaia bulguin maškar penge pe mande;
Von gindin pe ke muřo nekazo peravel ma:
9Vo si daranes astardo,
Eta lo tele, vo či uštila!
10Kudo kai simas lesa ande e patia,
Kai sas ma ande leste muřo patiamos ai kai xalas muřo manřo,
Kerdilo muřo dušmano.
11Tu, Baro Del, t'avel tuke mila mandar ai tho ma palpale!
Ai me dava len so si lengo.
12Me žianava ke tu kames ma,
Te na muřo dušmano niril pe mande.
13Tu ninkerdian ma pala muřo čačimos,
Ai tu thodian ma pe sakda angla tute.
14Svintsime t'avel o Baro Del, o Del katar o Israel, vitsa vitsatar!
Amen! Amen!
