1Psalmo le Davidoske. Kana sas ande e pusta o Juda.
2O Del! tu san muřo Del, me rodav tu;
Muřo duxo trušala pala tute, muřo stato vatil pala tute,
Ande jekh phuv nangi, šuki, bi paiesko.
3Kadia me dikhav pe tute ande o svinto than,
Te dikhav tjiri zor ai tjiro vestimos.
4Ke tjiri dragostia kerel mai mišto sar o traio:
muře vuš vestin tjire luvudimata.
5Me svintsova tut sa muřo traio,
Me vazdava muře vast ande tjiro anav.
6Muřo duxo avela čailo sar xamos thulo ai guglo,
Ai, tsipimasa veseli pe le vuš, muřo mui vestila tu.
7Kana da ma godji tute ande muřo than.
Dav ma godji tutar kana či sovav e riate.
8Ke tu san muřo skipitori,
Ai me sim ande o veselimos tela e ušialin tjire phakengi.
9Muřo duxo si astardo tute;
Tjiro čačo ninkerel ma.
10Numa kudala kai roden te len muřo traio
Žiana ande e hunia la phuviaki;
11Von avena dine ka e xanřo,
Von avena e partia le šakalonge.
12Ai o amperato veselil pe ande o Del;
Kon solaxala pe leste vestila pe,
Ke o mui le xoxamnesko avela phandado.
