1Ka o birevo kudalengo kai gjilaben. Pe e melodia «Na phag». Psalmo le Asafoske. Gjili.
2Ame luvudisaras tu, o Del! ame luvudisaras tu;
Tjiro anav si ande amaro mui;
Ame phenasa tjire šukarimata.
3Ande e vramia kai me thava,
Dav me kris čačimasa.
4E phuv miškil sa kudalensa kai bešen pe late:
Me, ninkerav lake stilpuri.
5Phen kudalenge kai luvudin pe: Na vestin tume!
Ai le nasulenge: Na ker barimata!
6Na ker barimata anda tumari zor pa o čeri,
Na den duma kadia barimatansa!
7Ke nai či anda pe e rig čači, či anda pe e rig stingo,
Či anda e pusta, kai avel o uštimos.
8Numa o Del si kudo kai del kris:
Vo peravel jekhes, ai uštiavel kavres.
9Si ande o vast le Bare Devlesko jekh taxtai,
Kai hamil pe jekh mol pherdi hamime,
Ai vo šiorel:
Sa le nasul la phuviake čařen pen ži ande o gor.
10Me phenava kadala dieli pe sakda;
Me gjilabava ande e pativ le Devleski katar o Jakob.
11Ai me peravava sa le zora le nasulenge;
Le zora katar le vorta avena vazde.
