1Ka o birevo kudalengo kai gjilaben. Le tsiturensa sirmensa. Psalmo le Asafoske. Gjili.
2O Del si prinžiardo ande o Juda,
Lesko anav si baro ande o Israel.
3Leski tseřa si ande o Salem,
Ai lesko kher ande o Sion.
4Kothe phaglias le sulitsi,
O fedevo, e xanřo, ai le armi le marimaske.
5Tu san mai amperatisko, mai zuralo
Sar le purane plaia.
6Si line pa lende, kudala ketani harniči,
Von soven ande pengo mai paluno sovimos;
Von či žiangle sar te maren pe, sa kudala harniči ketani.
7Kana tu daraves, Del katar o Jakob!
Von sute, grastaria ai grast.
8Tu san darano, o tu!
Kon šai ninkerel angla tute, kana tjiri xoli phařadiol?
9Opral anda le čeri tu phendian tjiri kris;
E phuv daratar bešli muto,
10Kana o Del uštilo te del kris,
Te skipil sa le čořen la phuviake.
11O manuš vestil tu inke ande peski xoli,
Kana les pe tute sa tjiri xoli.
12Phenen so si te keren ka o Baro Del, tumaro Del, ai keren le!
Ke sa kudala kai si krugom lestar anen podarki ka o Del darano!
13Vo peravel le barimata le prinsonge,
Vo Si kai daravel le amperatson la phuviake.
