Psalmo 86

Baro Del, tho o kan, ker pe muři!

Ke me sim nekežime ai prosto.

₂Arakh muřo duxo, ke me patiav!

Muřo Del, skipisar tjira sluga kai del pe tute!

₃T'avel tuke mila mandar, Baria!

Ke me tsipiv pe tute sa o dies.

₄Veselisar o duxo tjira slugako,

Ke tuke, Baria, vazdav muřo duxo.

₅Ke tu san lašio, Baria, tu jertis,

Tu san pherdo kamimos kudalenge kai akharen tu.

₆Baro Del, tho o kan ka muřo řudjimos,

Le sama ka o hango kai me mangav!

₇Me akharav tu o dies muře nekazosko,

Ke tu keres pe muři.

₈Khonik nai sar tute maškar le dela, Baria,

Ai khanči či maziol sar tjire butia.

₉Sa le thema kai tu kerdian avena

Te klonin pe angla tjiri fatsa, Baria,

Ai vestina tjiro anav.

₁₀Ke tu san baro, ai tu keres čudeni;

Tu ferdi, tu san Del.

₁₁Sikiar ma tjiri vurmi, o Baro Del!

Me phirava ande tjiro čačimos.

Ker te daral muřo ilo anda tjiro anav.

₁₂Me luvudiva tu ande sa muřo ilo,

Baria, muřo Del!

Ai me vestiva tjiro anav pe sakda.

₁₃Ke tjiro mištimos si baro karing mande,

Ai tu skipis muřo duxo katar le thana bare le merimaske.

₁₄O Del! Le barimatange uštile pe mande,

Jekh trupa manušengi nasul kamen te len muřo traio;

Nai len ginduri pe tute.

₁₅Numa tu, Baria, tu san jekh Del miloso ai lašio,

Kovlo ka e xoli, barvalo ande o mištimos ai o

čačimos;

₁₆Ambolde karing mande o dikhimos ai t'avel tuke mila anda mande,

De e zor ka tjiri sluga,

Ai skipisar o šiav tjira služankako!

₁₇Ker mange jekh semno!

Ke muře dušmaia te dikhen les ai t'aven tele!

Ke tu ažutis ma ai les sama mandar, o Baro Del!