Sikavimos 21

₁Porme me dikhlem jekh nevi phuv ai jekh nevo čeri; ke o mai angluno čeri ai e mai angluno phuv bilaile, ai nas mai maria.

₂Ai me dikhlem ke vulel anda o Del, o foro svinto, o nevo Jerusalem, anda o čeri lašiardo sar jekh terni uriadi peske řomeske. ₃Ai me ašundem anda o skamin amperatisko jekh zuralo hango kai phenelas: Eta o tabernaklo le Devlesko le manušensa! Vo bešela lensa, ai von avena lesko narodo, ai inke o Del avela lensa. ₄Vo khosela sako asvin pa lenge jakha, ai e martia či mai avela, ai či mai avela te žalin, či tsipimos, či dukh, ke le mai angluni dieli bilaile.

₅Ai kudo kai bešelas pe o skamin amperatisko phenel: Eta, me kerav sa le dieli neve. Ai vo phenel: Ramosar, ke kadala vorbi si čače ai vorta.

₆Ai vo phenel mange: Si gata! Me sim o alfa ai o omega, de anda o gor ži kai getol pe. Ka kudo kai si trušalo me dava les katar o xaing kai xutel o pai le traiosko, ivia. ₇Kudo kai nirila avela leske kudala dieli; me avava lesko Del, ai vo avela muřo šiav. ₈Numa le darane, kudala kai či patian, le vuřitsi, le mudarimaske, le kurvaria, le drabarne, kudala kai si lenge drago le staturi, ai sa le xoxamne, lengi partia avela ande e balta phabardi la jagaki kai phabol o sulfuro. Kudia si e duito martia.

₉Porme jekh anda le efta andželi kai ninkerelas le efta taxta pherde katar le efta mai paluni dukha avel, ai vo del mansa duma, phenelas: Aidi, me sikavava tuke la řomnia, e řomni katar o Bakrořo. ₁₀Ai vo ningerdias ma anda o Duxo pe jekh baro plai opre. Ai vo sikavel mange o foro svinto, o Jerusalem, kai vulelas anda o čeri, tradino katar o Del.

₁₁Si les vestimos le Devlesko, lesko strefialimos sas jekh fialo sar jekh bař pria kuč, sar o jaspis, vužio sar o kristalo. ₁₂Sas la jekh baro ai vučo zido. Sas les deš-u-dui vudara, ai pe le vudara deš-u-dui andželi, ai anava ramome, kudala anda le deš-u-dui kumpani katar le šiave anda o Israel: ₁₃pe e čači rig trin vudara, pe e rig opre trin vudara, pe e rig tele trin vudara, ai pe e stingo trin vudara. ₁₄O zido le forosko sas les fundo ande deš-u-dui thana, ai pe lende le deš-u-dui anava le deš-u-donge apostoli katar o Bakrořo.

₁₅Kudo kai delas mansa duma sas les mezura jekh kaštořo sunakuno, eta te mezuril o foro, leske vudara, ai lesko zido. ₁₆O foro sas kerdo sar kvadrato, ai lesko lungimos sas jekh fialo sar o barimos. Vo mezuril o foro le řaiasa ai arakhlias 2200 kilometri; o lungimos, o buvlimos ai o vučimas sas sa jekh fialo. ₁₇Vo mezuril o zido, ai arakhlias šov-var-deš ai panž metri, mezura manušeski, kai sas vi le andželongi. ₁₈O zido sas lašiardo anda o jaspis, ai o foro sas anda o sunakai vužio, jekh fialo sar e voiaga vuži. ₁₉Le funduri le zidoske le foroske sas šukarde le bařensa kuč anda sako fialo: o jekhto fundo sas anda o jaspis, o duito anda o safiro, o trito anda o xalsedono, o štarto anda o smaragdo, ₂₀o panžto anda o sardonikso, o šovto anda o sardiono, o eftato anda o krisolito, o oxtoto anda o berilo, o iniato anda o topazo, o dešto anda o krisopraso, o deš-u-jekhto anda o jatsinto, o deš-u-duito anda o ametisto. ₂₁Le deš-u-dui vudara sas deš-u-dui meržali; sako vudar sas anda ferdi jekh meržalia. O platso le forosko sas sunakuno vužio, sar e voiaga kai šai dikhes inčial.

₂₂Me či dikhlem templo ande o foro; ke o Baro o Del Mai Zuralo si lesko templo, vi o Bakrořo. ₂₃O foro či trubul les či o kham či o šiunuto te strefial les; ke o vestimos le Devlesko strefial les, ai o Bakrořo ai leski pařa. ₂₄Le thema phirena ka leski vedaria, ai le amperatsi la phuviake anena pengo vestimos. ₂₅Leske vudara či avena phandade diese, ke či avela kote riat. ₂₆Anena o vestimos ai o barvalimos le themenge. ₂₇Či dena andre ande leste khanči mahrime, či khonik kai kerel vuřitsimos vai xoxaimos; dena andre ferdi kudala kai si ramome ande e kliška le traioski katar o Bakrořo.