Sikavimos 22

₁Ai vo sikavel mange jekh baro pai le traiosko, strefial sar o kristalo, kai anklelas avri anda o skamin amperatisko katar o Del ai katar o Bakrořo. ₂Maškar o platso le forosko ai pe le dui bereguri le paieske, sas o kopači le traioski, kai delas deš-u-duvar fruti, delas peski fruta sako šion, ai kai lake patria sas laše te sastiaren le thema. ₃Či mai avela prasaimos. O skamin amperatisko le Devlesko ai le Bakrořesko avena ande o foro; leske služi služina les ai dikhena leski fatsa, ₄ai lesko anav avela pe sa le čikata. ₅Či mai avela riat; ai či mai trubula len či lampo či vedaria katar o kham, ke o Baro o Del strefiala len. Ai von amperetsina berš beršesa.

₆Ai vo phenel mange: Kadala vorbi si čače ai vorta; ai o Baro, o Del katar le duxuri le profetonge, tradias peske andželos te sikavel ka peske služi le dieli kai sigo si t'aven.

₇Ai eta, Me sigo si t'avav. Veselo kudo kai garavel le vorbi katar e profesia katar kadia kliška!

₈Me sim o Jono, kai ašundem ai dikhlem kadala dieli. Ai kana me ašundem ai dikhlem, me pelem ka le punře le andželoske kai vo sikadias mange, te kamav les. ₉Numa vo phenel mange: Le tu sama te keres kudia! Me sim tjiro vortako kai služiv, ai kudo tjire phralengo le profeturi, ai kudalengo kai arakhen le vorbi kadala kliškake. T'avel tuke drago o Del.

₁₀Ai vo phenel mange: Na tho pečata pe kadala vorbi katar e profesia katar kadia kliška. Ke e vramia si paše. ₁₁Ke kudo kai kerel nasul te kerel mai nasul, ke kudo kai si mahrime t'avel mai mahrime; ai ke kudo kai kerel vorta te kerel mai vorta, ai kudo kai si svinto t'avel mai svinto.

₁₂Eta, me sigo avav, ai so si ma te dav si mansa, te dav sakones sar vo kerdias butji. ₁₃Me sim o Alfa ai o Omega, o mai angluno ai o mai paluno, de anda o gor ži ande o gor.

₁₄Veseli kudala kai xalaven penge tsalia, eta t'avel lenge slobodo ka o kopači le traioski, ai te den andre katar le vudara ande o foro! ₁₅Avri anda o foro le vuřitsose, le drabarne, le kurvaria, le mudarimaske, kai patian le staturi, ai kon-godi si leske drago ai kerel o xoxaimos.

₁₆Me, o Jesus, me tradem muře andželos te del tumenge kadala dieli ande le khangeria. Me sim ande e vitsa katar o David, e čeřai kai strefial diminiats.

₁₇Ai o Duxo ai e řomni phenen: Aidi. Ai kudo kai ašunel phenen: Aidi. Ai kudo kai si trušalo, t'avel; ai kudo kai kamel, te lel o pai le traiosko, ivia.

₁₈Me phenav varekaske kai ašunel le vorbi katar e profesia kadala kliška ke te lel sama: Te si varekon ke thol opral pe kudala vorbi, o Del malavela les le dukhensa katar kadia kliška; ₁₉ai te si varekon ke lel tele vareso anda le vorbi katar kadia kliška anda kadia profesia, o Del šinela leski partia anda e fruta la kopačeski le traioski ai katar o foro svinto, kai ramon lendar ande kadia kliška.

₂₀Kudo kai del marturia kadala dieli phenel:

₂₁Ke e dragostia le Bareski o Jesus t'avel tumensa sa! Amen.

GATA E NEVI VASTIA.