ECCLESIASTES 3

₁Τοῖς πᾶσιν χρόνος,

καὶ καιρὸς τῷ παντὶ πράγματι ὑπὸ τὸν οὐρανόν.

₂καιρὸς τοῦ τεκεῖν καὶ καιρὸς τοῦ ἀποθανεῖν,

καιρὸς τοῦ φυτεῦσαι καὶ καιρὸς τοῦ ἐκτῖλαι πεφυτευμένον,

₃καιρὸς τοῦ ἀποκτεῖναι καὶ καιρὸς τοῦ ἰάσασθαι,

καιρὸς τοῦ καθελεῖν καὶ καιρὸς τοῦ οἰκοδομῆσαι,

₄καιρὸς τοῦ κλαῦσαι καὶ καιρὸς τοῦ γελάσαι,

καιρὸς τοῦ κόψασθαι καὶ καιρὸς τοῦ ὀρχήσασθαι,

₅καιρὸς τοῦ βαλεῖν λίθους καὶ καιρὸς τοῦ συναγαγεῖν λίθους,

καιρὸς τοῦ περιλαβεῖν καὶ καιρὸς τοῦ μακρυνθῆναι ἀπὸ περιλήμψεως,

₆καιρὸς τοῦ ζητῆσαι καὶ καιρὸς τοῦ ἀπολέσαι,

καιρὸς τοῦ φυλάξαι καὶ καιρὸς τοῦ ἐκβαλεῖν,

₇καιρὸς τοῦ ῥῆξαι καὶ καιρὸς τοῦ ῥάψαι,

καιρὸς τοῦ σιγᾶν καὶ καιρὸς τοῦ λαλεῖν,

₈καιρὸς τοῦ φιλῆσαι καὶ καιρὸς τοῦ μισῆσαι,

καιρὸς πολέμου καὶ καιρὸς εἰρήνης.

₉τίς περισσεία τοῦ ποιοῦντος ἐν οἷς αὐτὸς μοχθεῖ;

₁₀εἶδον σὺν τὸν περισπασμόν, ὃν ἔδωκεν ὁ θεὸς

τοῖς υἱοῖς τοῦ ἀνθρώπου τοῦ περισπᾶσθαι ἐν αὐτῷ.

₁₁σὺν τὰ πάντα ἐποίησεν καλὰ ἐν καιρῷ αὐτοῦ

καί γε σὺν τὸν αἰῶνα ἔδωκεν ἐν καρδίᾳ αὐτῶν,

ὅπως μὴ εὕρῃ ὁ ἄνθρωπος

τὸ ποίημα, ὃ ἐποίησεν ὁ θεός, ἀπ᾽ ἀρχῆς καὶ μέχρι τέλους.

₁₂ἔγνων ὅτι οὐκ ἔστιν ἀγαθὸν ἐν αὐτοῖς

εἰ μὴ τοῦ εὐφρανθῆναι καὶ τοῦ ποιεῖν ἀγαθὸν ἐν ζωῇ αὐτοῦ·

₁₃καί γε πᾶς ὁ ἄνθρωπος, ὃς φάγεται καὶ πίεται

καὶ ἴδῃ ἀγαθὸν ἐν παντὶ μόχθῳ αὐτοῦ,

δόμα θεοῦ ἐστιν.

₁₄ἔγνων ὅτι πάντα, ὅσα ἐποίησεν ὁ θεός,

αὐτὰ ἔσται εἰς τὸν αἰῶνα·

ἐπ᾽ αὐτῷ οὐκ ἔστιν προσθεῖναι,

καὶ ἀπ᾽ αὐτοῦ οὐκ ἔστιν ἀφελεῖν,

καὶ ὁ θεὸς ἐποίησεν, ἵνα φοβηθῶσιν ἀπὸ προσώπου αὐτοῦ.

₁₅τὸ γενόμενον ἤδη ἐστίν,

καὶ ὅσα τοῦ γίνεσθαι, ἤδη γέγονεν,

καὶ ὁ θεὸς ζητήσει τὸν διωκόμενον.

₁₆Καὶ ἔτι εἶδον ὑπὸ τὸν ἥλιον τόπον τῆς κρίσεως,

ἐκεῖ ὁ ἀσεβής,

καὶ τόπον τοῦ δικαίου,

ἐκεῖ ὁ ἀσεβής.

₁₇εἶπα ἐγὼ ἐν καρδίᾳ μου

Σὺν τὸν δίκαιον καὶ σὺν τὸν ἀσεβῆ κρινεῖ ὁ θεός,

ὅτι καιρὸς τῷ παντὶ πράγματι

καὶ ἐπὶ παντὶ τῷ ποιήματι.

₁₈ἐκεῖ εἶπα ἐγὼ ἐν καρδίᾳ μου

περὶ λαλιᾶς υἱῶν τοῦ ἀνθρώπου,

ὅτι διακρινεῖ αὐτοὺς ὁ θεός,

καὶ τοῦ δεῖξαι ὅτι αὐτοὶ κτήνη εἰσὶν καί γε αὐτοῖς.

₁₉ὅτι συνάντημα υἱῶν τοῦ ἀνθρώπου

καὶ συνάντημα τοῦ κτήνους,

συνάντημα ἓν αὐτοῖς·

ὡς ὁ θάνατος τούτου, οὕτως ὁ θάνατος τούτου,

καὶ πνεῦμα ἓν τοῖς πᾶσιν·

καὶ τί ἐπερίσσευσεν ὁ ἄνθρωπος παρὰ τὸ κτῆνος;

οὐδέν, ὅτι τὰ πάντα ματαιότης.

₂₀τὰ πάντα πορεύεται εἰς τόπον ἕνα·

τὰ πάντα ἐγένετο ἀπὸ τοῦ χοός,

καὶ τὰ πάντα ἐπιστρέφει εἰς τὸν χοῦν·

₂₁καὶ τίς οἶδεν πνεῦμα υἱῶν τοῦ ἀνθρώπου

εἰ ἀναβαίνει αὐτὸ εἰς ἄνω,

καὶ πνεῦμα τοῦ κτήνους

εἰ καταβαίνει αὐτὸ κάτω εἰς γῆν;

₂₂καὶ εἶδον ὅτι οὐκ ἔστιν ἀγαθὸν

εἰ μὴ ὃ εὐφρανθήσεται ὁ ἄνθρωπος

ἐν ποιήμασιν αὐτοῦ, ὅτι αὐτὸ μερὶς αὐτοῦ·

ὅτι τίς ἄξει αὐτὸν τοῦ ἰδεῖν ἐν ᾧ ἐὰν γένηται μετ᾽ αὐτόν;