CHAPITRE TREGEN 13

₁Avans la fèsto de Pasco, Jèsu sachènt qu'èro vengudo soun ouro de passa d'aquest mounde vers soun Paire, estènt qu'avié ama li siéu qu'èron dins lou mounde, lis amè jusquo à la fin.

₂E, la soupado finido (lou diable aguènt deja mes au cor de Judas l'Escariot, fiéu de Simoun, la pensado de lou trahi),

₃Jèsu sachènt que lou Paire i'avié remés touto causo entre si man, e qu'èro sourti de Diéu, e que vers Diéu s'entournavo,

₄S'aubourè de taulo, quitè si vièsti; e aguènt pres un linge, se lou boutè autour.

₅Pièi vujè d'aigo dins un grasau, e se boutè à lava li pèd de si disciple, e peréu à lis eissuga 'mé lou linge qu'avié à la centuro.

₆Venguè dounc vers Simoun-Pèire. E ié diguè Pèire: Segnour, vous, me lavas li pèd?

₇Jèsu ié respoundeguè: Ço que iéu fau, tu n'en sabes rèn aro; mai lou saubras plus tard.

₈Pèire ié venguè: Me li lavarés pas li pèd, jamai de la vido. Jèsu ié respoundeguè: Se noun te lave, auras ges de part emé iéu.

₉Alor diguè Simoun-Pèire: Segnour, noun soulamen mi pèd, mai encaro li man e la tèsto.

₁₀Jèsu de ié dire: Aquéu qu'a pres un ban, n'a plus besoun que de se lava li pèd, e se trovo pur en plen. E vautre, sias pur, mai pas tóuti.

₁₁Car sabié quau èro aquéu que lou trahirié; es amor d'acò que diguè: Sias pas tóuti pur.

₁₂Après i'avé lava li pèd e représ si vièsti, éu s'estènt tourna-mai entaula, ié diguè: Sabès ço que vène de vous faire?

₁₃Vautre, m'apelas Mèstre e Segnour; e disès bèn, car lou siéu.

₁₄Adounc se iéu vous ai lava li pèd, estènt lou Segnour e lou Mèstre, vàutri peréu devès vous lava li pèd dis un is autre.

₁₅Vous ai dóumaci douna l'eisèmple, pèr que, coume iéu vous ai fa, ansin peréu vautre fagués.

₁₆Veramen, veramen vous lou dise, lou varlet n'es pas mai grand que soun mèstre; ni l'apoustòli mai grand qu'aquéu que l'a manda.

₁₇Se sabès aquéli causo, sarés urous, mai que li pratiqués.

₁₈Es pas de tóuti vautre que dise acò. Iéu sabe aquéli qu'ai chausi; mai fau que l'Escrituro se coumpligue: Aquéu que manjo de pan emé iéu levara contro iéu soun taioun.

₁₉Aro-aro vous lou dise, de davans que la causo arribe, pèr que, se 'n-cop sara arribado, creigués à ço que siéu.

₂₀Veramen, veramen vous lou dise, qu reçaup aquéu qu'aurai manda, me reçaup iéu; e qu me reçaup iéu, reçaup Aquéu que m'a manda.

₂₁Aguènt di aquéli causo, Jèsu fuguè treboula dins soun esperit; escudelè touto sa pensado, e diguè: Veramen, veramen vous lou dise, l'un de vautre me trahira.

₂₂Em'acò s'espinchavon dis un is autre, li disciple, en pas sachènt de quau parlavo.

₂₃Mai l'un d'éli se devinavo coucha sus lou sen de Jèsu, aquéu qu'amavo Jèsu.

₂₄Simoun-Pèire ié faguè signe, e ié diguè: De quau es que parlo?

₂₅Aquéu disciple, s'estènt alor clina sus lou sen de Jèsu, ié venguè: Segnour, quau es?

₂₆Jèsu respoundeguè: Es aquéu en quau pourgirai iéu de pan saussa. E, aguènt saussa de pan, lou baiè à Judas l'Escariot, fiéu de Simoun.

₂₇E tant-lèu presso aquelo boucado, Satan intrè dins éu. E ié diguè Jèsu: Ço que fas, fai-lou vitamen.

₂₈Mai pas-un di counvivo sachè perqué i'avié di 'cò.

₂₉Quàuquis-un se pensavon que, coume Judas tenié la bourso, Jèsu avié vougu dire: Croumpo ço que nous fau pèr la fèsto; o que ié coumandavo de douna quaucarèn i paure.

₃₀Judas, aguènt dounc pres sa boucado, sourtiguè tout-d'un-tèms. E fasié niue.

₃₁Quand fuguè sourti, Jèsu diguè: Aro es englouria lou Fiéu de l'ome, e Diéu es englouria dins éu.

₃₂Se Diéu es englouria dins éu, Diéu l'englouriara tambèn en éu-meme; e lèu-lèu l'englouriara.

₃₃Mi pichounet, pèr plus gaire de tèms siéu emé vautre. Me cercarés, e ço qu'i Judiéu ai di: «Ounte iéu vau, noun poudès veni,» tambèn à vautre lou dise vuei.

₃₄Vous doune un coumandamen nouvèu: Es que vous amés lis un lis autre; o, que vous amés lis un lis autre coume vous ai ama.

₃₅Es à-n-acò d'aqui que tóuti couneiran que sias mi disciple, s'avès d'afecioun lis un pèr lis autre.

₃₆Simoun-Pèire ié diguè: Segnour, ounte anas? Ié respoundeguè Jèsu: Ounte iéu vau, aro noun pos me segui; mai me seguiras après.

₃₇Pèire ié venguè: Perqué noun pode vous segui aro? Dounarai ma vido pèr vous.

₃₈Jèsu ié repliquè: Ta vido, la dounaras pèr iéu? Veramen, veramen te lou dise, cantara pas lou gau que noun m'agues renega tres cop.