CHAPITRE DÈS-E-SETEN
L'ouresoun sacerdoutalo de Noste-Segne Jèsu-Crist. — Éu prègo pèr sa glourificacioun coume Sauvaire. — Prègo pèr si disciple e tóuti si cresènt. — Sa desiranço ardènto: que li siéu siegon plus qu'un coume éu es un emé soun Paire.
1Ansin parlè Jèsu. Aussant pièi lis uei de-vers lou cèu, diguè: Paire, es vengudo l'ouro; glourifico toun Fiéu, pèr que toun Fiéu te glourifique,
2E — coume i'as remés lou poudé sus touto car — pèr que coumunique, à tóuti aquéli que i'as douna, la vido eternalo.
3Or, la vido eternalo es que te counèigon, tu lou soulet Diéu verai, emai aquéu qu'as manda, Jèsu-Crist.
4Iéu t'ai englouria sus la terro; ai acaba l'obro que m'as dounado à faire.
5E aro, tu, enlusisse-me, Paire, en tu-meme, d'aquelo glòri qu'ai agudo en tu, de davans que lou mounde fuguèsse.
6Ai fai counèisse toun noum is ome que m'as douna dóu mitan dóu mounde. Èron tiéu, e me lis as douna; e ta paraulo, l'an gardado.
7Aro sabon que tout ço que m'as douna vèn de tu;
8Car li paraulo que m'as dounado à iéu, lis ai dounado à-n-éli, e lis an reçaupudo; e an couneigu dóu bon que siéu sourti de tu, e an creigu qu'es tu que m'as manda.
9Iéu prègue pèr éli; noun es pèr lou mounde que prègue, mai pèr aquéli que m'as douna, dóumaci soun tiéu.
10Tout ço qu'es miéu es tiéu, e ço qu'es tiéu es miéu. E siéu glourifica dins éli.
11Deja siéu plus dins lou mounde; mai éli dins lou mounde soun, e iéu vers tu m'entourne. Paire sant, gardo-lèi en toun noum aquéli que m'as douna, pèr que siegon un coume nautre.
12Quand ère em'éli, iéu li gardave en toun noum. Aquéli que m'as douna, lis ai garda, e se n'es ges perdu, aleva lou fiéu de perdicioun, pèr que l'Escrituro siegue acoumplido.
13Mai aro vène vers tu, e dise aquéli causo, estènt encaro dins lou mounde, pèr que ma joio, l'agon dins éli en sa plenour.
14Iéu i'ai douna ta paraulo, e lou mounde lis a abourri, en estènt que soun pas dóu mounde, coume iéu nimai siéu pas dóu mounde.
15Te prègue pas de li leva dóu mounde, mai de li garda dóu mau.
16Dóu mounde noun soun, coume iéu tambèn noun siéu dóu mounde.
17Santifico-lèi dins la verita. Ta paraulo es la verita memo.
18Coume tu m'as manda dins lou mounde, emai iéu lis ai manda dins lou mounde.
19E pèr éli iéu me santifique, pèr que siegon, éli peréu, santifica dins la verita.
20Noun es pèr éli soulamen que prègue, mai tambèn pèr aquéli que creiran en iéu, sus sa paraulo,
21Dins l'estiganço que tóuti siegon un, coume tu, Paire, siés en iéu, e iéu en tu; que siegon tambèn un en nautre, pèr que lou mounde crèigue que tu m'as manda.
22La glòri que m'as dounado, iéu l'ai dounado à-n-éli; pèr que siegon un, coume nàutri peréu sian un.
23Iéu en éli, e tu en iéu, pèr que siegon foundu en plen dins l'unita, e que lou mounde counèigue que tu m'as manda, e que lis as ama éli coume m'as ama iéu.
24Paire, aquéli que m'as douna, vole qu'ounte siéu, éli tambèn ié siegon emé iéu, pèr que vegon ma glòri, aquelo que m'as dounado, raport que m'as ama avans la creacioun dóu mounde.
25Paire juste, lou mounde t'a pas couneigu. Mai iéu t'ai couneigu, e aquésti an couneigu que tu m'as manda.
26I'ai fa counèisse toun noum e ié farai counèisse encaro, pèr que l'amour emé quau m'as ama iste en éli, emai iéu en éli.
