Tchaip. XXIV. 24

₁Quand Djîsus soûtchit di tempye pou s’en rolla, sas discipyes s’aippreutchennent de lu, pou li fâre ai‐voure lai construction et peu lai granteu de ce mônument.

₂Main è leû dit: Voîtes‐vous tretous ças bâtiments? I vos lou dis pou di sûr, es serant se tallement détruts qu’è n’y demoûererai pais pîre su pîre.

₃Peu di temps que l’étât seta desus lai montaigne das ôlivies, sas discipyes s’aippreutchennent de lu en pairticulie, et peu li disennent: Dites‐nous quand ças tchoses airriverant, et peu qué signe è y airai de vôte airriva et peu de lai consoumation di sîkye.

₄Peu Djîsus leû répondit: Prentes gâdge que quéqu’ûn ne vos séduse;

₅Paiche que bécô vînrant desous mon nom, et peu que dirant: I seus lou Christ; et peu es en sédurant bécô.

₆Vos entendriz aitou paila de gâres, et peu de bruts de gâres: main gaidgeâz‐vous bîn de vos troubia; paiche qu’è faut que ças tchoses airrivînt: main çouqui ne serai pais encoûe lai fîn.

₇Paiche qu’es vôrant se leva peupye contre peupye, et peu royaume contre royaume, et peu è y airai das pestes, das disottes et peu das trembyements de târe dans bîn das endraits.

₈Peu tout çouqui ne serai que lou quemencement das douleus.

₉Ailours es vous livrerant as djudges pou étre tourmentas, et peu es vos ferant ai‐meuri; et peu vos seriz détestas de tout lou monde ai cause de mon nom.

₁₀Dans ce mainme temps bécô trouverant das ôcasions de scandaile et peu de tchute; es se traihirant, et peu se détesterant tretous las ûns las autres.

₁₁E s’éleuverai bécô de faux prôphétes, que sédurant bécô de dgens.

₁₂Peu paiche que l’îndjustice aibonderai, lai tchairité de bécô se renfroidirai.

₁₃Main c’tu‐lai serai sauva, que persévererai djûnsqu’ai lai fîn.

₁₄Peu c’t évaindgile di royaume serai prôdgie pai toute lai târe, pou sarvi de témoignaidge ai tout lou monde; et peu ç’ost ailours que lai fîn airriverai.

₁₅Quand vos vôriz don que l’aibôminâtion de lai désoulâtion, qu’ost aivu ainnoncie pai lou prôphéte Dâniel, serai dans lou lue saint, que c’tu que lé entende bîn ce qu’è lé.

₁₆Ailours que ceux que serant dans lai Djudée, s’en sauvînt desus las montaignes.

₁₇Que c’tu que serai desus lou quetchot di quevâ, n’en dâscende pont pou empoûetcha auque de sai môson.

₁₈Peu que c’tu que serai dans lou tchamp, ne revegne pont pou penre sas haibits.

₁₉Main mâlheu as fonnes que serant grôsses ou bîn neurrices en ças djoûes‐qui.

₂₀Priâz don lou bon Due que vôte fute n’airrive pont durant l’huvâ, ne lou djoûe di saibbait.

₂₁Paiche que l’aiffliction de ce temps‐lai serai se tallement grante qu’è n’y en ost pont aivu de tée deu lou quemencement di monde djûnsqu’ai present, et peu qu’è n’y en airai djaimâs.

₂₂Peu se ças djoûes ne sînt aivu aibrédgies, nun ne serai aivu sauva; main ças djoûes serant aibrédgies ai cause das élus.

₂₃Ailours se quéqu’ûn vos dit: Lou Christ ost iqui, ou bîn l’ost ilai; ne lou craites pais.

₂₄Paiche qu’è s’éleuverai das faux christs et peu das faux prôphétes, que ferant das grands mirâkyes et peu das tchoses que nun ne sairai compenre, djûnsqu’ai sédure, se l’étât pôssibye, las élus mainmes.

₂₅I a vyu vos en aivarti bîn devant.

₂₆Se es vos disant don: Lou voiqui dans lou désât; ne soûtchiz pont pou y olla. Se es vos disant: Lou voiqui dans l’endrait lou pus retirie de lai môson; ne lou craites pont.

₂₇Paiche que coumme n’éluse que soue de l’ôrient, sembye tout pou în cô djûnsqu’ai l’ôccident, dînquîn serai l’airriva de l’Offant de l’houmme.

₂₈Laivoù que ce sait que lou coue se trouve, las ayes se raitrouperant.

₂₉Tout d’aiprés ças djoûes de mâlheu, lou soureil meussirai et peu lai leune ne beillerai pus sai lemîre, las étoiles tchoûrant di cîl, et peu las pussances di cîl serant ébrânnas.

₃₀Ailours lou signe de l’Offant de l’houmme pairaitrai dans lou cîl, et peu tous las peupyes de lai târe serant dans las pieurs et peu dans las dgîmissements; et peu es vôrant l’Offant de l’houmme que vînrai desus las nues di cîl aivô ne grand pussance et peu ne grand maidjesta.

₃₁Peu l’envierai sas andges, que ferant entenre lai voix équiatante de leux trompottes, et peu que raitrouperant sas élus das quaitre câres di monde, deu în bout di cîl djûnsqu’ai n’autre.

₃₂Aipprentes ne compairéson tirie d’în figuie. Quand sas brantches sont dédjai tenres, et peu qu’è bousse das feuilles, vos sétes que lou bon‐temps ost proûetche:

₃₃Dînquîn quand vos vôriz tout çouqui, aipprentes que l’Offant de l’houmme ost proûetche, et peu que l’ost coumme ai lai poûtche.

₃₄I vos dis pou di sûr que c’te raice ne pésserai pont, que toutes ças tchoses ne sînt aiccompyies.

₃₅Lou cîl et peu lai târe pésserant; main mas pairoûles ne pésserant pont.

₃₆Pou ce djoûe et peu pou c’t houre‐qui, nun n’en ait coûegnossance, nian, pais mainme las andges di cîl, main ran que mon Pére.

₃₇Peu l’airriverai ai l’aivénement de l’Offant de l’houmme ce qu’airriva di temps de Noué.

₃₈Coumme dans las daries djoûes devant lou déludge, las hoummes maindgînt et peu beuvînt, se mairiyînt, et peu mairiyînt leû‐s‐offants, djûnsqu’i djoûe laivoù Noué entra dans l’airtche;

₃₉Peu qu’es ne coûegnossennent lou môment di déludge que quand è seurvînt, et peu empoûetcha tout lou monde: l’en serai dînquîn ai l’airriva de l’Offant de l’houmme.

₄₀Ailours de doue hoummes que serant dans în tchamp, l’ûn serai pris et peu l’autre lâssie.

₄₁De doue fonnes que meudrant dans în melîn, l’enne serai prise et peu l’autre lâssie.

₄₂Voûoilliz don, paiche que vos ne sétes pais ai quée houre vôte Seigneu det veni.

₄₃Aipprentes que se lou pére de faimille saivai ai quée houre de lai neu lou voulou det veni, l’ost prou sûr qu’è voûoillerôt, et peu qu’è ne lâsserai pais poitchie sai môson.

₄₄Teniz‐vous don aitou vos autres toûedje prots; paiche que l’Offant de l’houmme vînrai ai l’houre que vos ne pensâz pais.

₄₅Qu ost lou sarviteu fidèle et peu prudent, que son mâtre ait étabyi desus tous sas vôlots, pou leû distribua dans lou temps leutt pidance?

₄₆Hureux ce sarviteu, se son mâtre ai son airriva lou trouve ôcupa de lai soûtche.

₄₇I vos dis pou di sûr qu’è l’étâbyirai desus tous sas bîns.

₄₈Main se ce sarviteu ost mâtchant, et peu qu’è dise en lu‐mainme: Mon mâtre n’ost pais prés de veni;

₄₉Et peu qu’è se boute ai baittre sas compéres, ai maindgie et peu ai boire aivô das ivrougnes:

₅₀Lou mâtre de ce sarviteu vînrai i djoûe qu’è ne s’y aittend pais, et peu ai l’houre qu’é ne sât pais:

₅₁E lou sépairerai, et peu li beillerai pou paitaidge d’étre puni aivô las hypôcrites. Ç’ost iqui qu’è y airai das pieurs et peu das grîncements de dents.