1Psalmo le Davidoske.
Baro Del, ašun muřo řudjimos, tho o kan so me mangav!
Ker pe muřo ande tjiro čačimos, ande tjiri kris!
2Na aidi pe kris tjira slugasa!
Ke či jekh živindo nai vorta angla tute.
3O dušmano našel pala muřo duxo,
Vo inčarel tele pe phuv muřo traio;
Vo kerel te bešav ande le tuniariči,
Sar kudala kai mule de dumult.
4Muřo duxo si mardo ande mande,
Muřo ilo si rimome ande muřo peř,
5Me dav ma godji ka le diesa angla savořende,
Me dav ma godji pe sa tjire butia,
Me gindiv ma pe e butji anda tjiro vast.
6Vazdav muře vast karing tute;
Muřo duxo vatil pala tute, sar jekh phuv šuki.
7Gribisavo ta ker pe muřo, o Baro Del!
Muřo duxo phabol.
Na garav mandar tjiri fatsa!
Me avava jekh fialo sar kudala kai vulen ande e hunia.
8Ker mange de diminiats t'ašunav tjiro mištimos!
Ke me puři ma tute.
Ker mange te žianav e vurma kai trubul te phirav!
Ke me tuke vazdav muřo duxo.
9Skipisar ma katar muře dušmaia, o Baro Del!
Paša tute rodav jekh kai garadiovav.
10Sikiar ma te kerav sar tu kames!
Ke tu san muřo Del.
Ke te tjiro lašio duxo ningerel ma pe o drom čačo!
11Pala tjiro anav, Baro Del, de ma o traio!
Ande tjiri kris, le muřo duxo anda o nekazo!
12Ande tjiro mištimos, bilav muře dušmanon,
Ai ker te xasavon sa kai phariaren muřo duxo!
Ke me sim tjiri sluga.
