1Le Davidoske.
Svintsime t'avel o Baro Del, muřo bař,
Kai sikiarel muře vast pe o marimos,
muře naia te marav ma,
2Muřo ažutori ai muřo fedevo,
Muřo than opre kai garadiovav ai muřo skipitori,
Muřo fedevo, kuda kai si ma kai te garadiovav,
Kai teliarel tela mande mange muřo narodo!
3Baro Del, so si o manuš, te žianes les tu?
O šiav le manušesko te les sama lestar tu?
4O manuš si jekh fialo sar o haburo,
Leske diesa si sar e ušialin nai nakhel.
5Baro Del, bangiar tjire jakha, ai vuli!
Asba le plaia, ai t'aven thuvale!
6Ker te strefian le strefiaimata, ai de rigate muře dušmanon!
Šiude tjire sulitsi, ai ker te našen!
7Tho tjiro vast opral;
Le ma ai skipisar ma katar le bare paia,
Katar o vast le šiavengo le streinosko,
8Kai lengo mui phenen o xoxaimos,
Ai kai o čačimos si jekh čačimos xoxamno.
9O Del! me gjilabava tuke jekh gjili nevi,
Me vestiva tu pe jekh luto deše šelensa.
10Tu, kai des o skipimos le amperatson,
Kai skipis katar e xanřo kai mudarel o David, tjiri sluga,
11Le ma ai skipisar ma katar o vast le šiavengo le streinosko,
Kai o mui phenel o xoxaimos,
Ai kai o čačimos si čačimos xoxamno!
12Amare šiave si sar le čaria
Kai barion ande pengo ternimos;
Amare šeia sar le stilpuri risuime
Kai šukaren la avlina.
13Amare stali si pherde,
Den opral sako fialo xamos;
Amare žigeni bution miensa, deš miensa,
Ande amare kimpuri.
14Amare grasnia si pherde;
Nai xasarimos, nai phandaimos,
Nai tsipimos ande amare vulitsi!
15Veselo o narodo kai si leske kadia!
Veselo o narodo kai o Baro Del si o Del!
