Psalmo 69

₂Skipisar ma, o Del!

Ke le paia kamen te len muřo traio.

₃Me tasuvav ande e čik, bi te šai bešav;

Me pelem ande jekh hunia, ai le paia den pa mande opral.

₄Kjinuiv kai tsipiv, muřo girtiano šukiol,

muře jakha bilan, žikin me dikhav karing muřo Del

₅Von si mai but sar le bal pe muřo šero,

Kudala kai vuřitsin ma intaino;

Von si zurale, kudala kai kamen te xasaren ma,

Kai si bi gorako muře dušmaia,

So me či čordem, trubul te dav les palpale.

₆O Del! tu žianes muřo dilimos,

Ai muře doša nai garade angla tute.

₇Ke kudala kai ažiukeren ande tute te na aven perade pala mande,

Baria, Baro Del le řaioske zurale!

Ke kudala kai roden tu te na aven ande o lažiav pala mande,

Del anda o Israel!

₈Ke si tuke ke me ninkerav o lažiav,

Ke o lažiav te pherel muřo mui;

₉Me areslem jekh streino muře phralenge,

Jekh te na žianen le šiavenge katar muři dei.

₁₀Ke e bari griža tjire kheresko xalias ma

Ai le prasaimata kudalenge kai prasan tu pele pe mande.

₁₁Me mukav le asva ai postiv,

Ai si kudalestar ke avel pe mande o lažiav;

₁₂Me lav jekh gono sar tsalia,

Ai me sim kai von maren mui mandar.

₁₃Kudala kai bešen ka o vudar den duma pa mande,

Ai le matiarne katar e řetia zurali thon ma ande penge gjilia.

₁₄Numa me phenav tuke muřo řudjimos, o Baro Del!

Ke t'avel e vramia laši, o Del, pe tjiro baro mištimos!

De ma anglal, te phenes mange t'ažutis ma!

₁₅Ankalav ma avri anda e čik, ai te na mai dav andre!

Ke t'avav skipime katar muře dušmaia ai katar e hunia!

₁₆Ke le paia te na mai den opral pa mande,

Ke e hunia te na mai garavel ma,

Ai ke e groapa te na phandadiol pe mande!

₁₇Ker pe muři, Baro Del! ke tjiro mištimos si baro.

Ande tjire bare mili ambolde pe mande tjire dikhimata,

₁₈Ai na garav tjiri fatsa katar tjiri sluga!

Sar me sim ande o nekazo, gribisavo te ker pe muři!

₁₉Pašio paša muřo duxo, skipisar ma!

Skipisar ma katar muře dušmaia!

₂₀Tu žianes muřo žungalimos, muřo lažiav, muře vuřitsia;

Sa muře dušmaia si angla tute.

₂₁O vuřitsimos šinel muřo ilo, ai me sim nasvalo;

Me ažiukerav mila, numa intaino,

Te miluin ma, či arakhav či jekh.

₂₂Von thon fiara ande muřo xamos,

Ai, te teliaren muři truš, pheren ma šut.

₂₃Ke lengi skafidi t'avel lenge jekh kletka,

Ai jekh setka kai von garadion!

₂₄Ke lenge jakha te kořavon ai te na mai dikhen,

Ai te keren te miškin sakda le prašave!

₂₅Šiude pe lende tjiri xoli,

Ai ke tjiri phabardi xoli t'astarel le!

₂₆Ke lengo than t'avel pusto,

Ke te na mai avel khonik ande lenge tseři!

₂₇Ke von mai rimon kudales kai tu mares,

Von phenen le dukha kudalenge kai tu řanis.

₂₈Tho bezexa pe lenge bezexa,

Ai te na avel len partia ka tjiri mila!

₂₉Ke t'aven khosle anda e kliška le traioski,

Ai von te na aven ramome le vortonsa!

₃₀Me, me sim nekežime ai nasvalo:

O Del, ke tjiro ažutimos t'uštiavel ma!

₃₁Me vestiva o anav le Devlesko katar le gjili,

Me luvudiva les zurales katar le luvudimata.

₃₂Kudia si drago le Bare Devleske, mai but sar t'avel jekh guruv,

Le šingensa ai le petalonsa.

₃₃Le čoře dikhen ai veselin pe;

Tume kai roden le Devles, ke tumaro ilo te trail!

₃₄Ke o Baro Del ašunel ka le čoře,

Ai vo či marel mui katar le phangle.

₃₅Ke le čeri ai e phuv vestin les,

Le mari ai sogodi phirel!

₃₆Ke o Del skipila o Sion, ai vazdela le foruri katar o Juda;

Thona pe andre, ai lena len;

₃₇So avela katar leske slugi sa avela lenge,

Ai kudala kai kamen lesko anav bešena kothe.