1Gjili miloso le Davidoske, gjiabadi le Devleske, pala o Kuš, Beniamito.
2Baro Del, muřo Del! me rodav te garadiovav ande tute;
Skipisar ma katar sa kudala kai kamen mange nasul, ai muk ma.
3Eta te na šinel ma, san jekh liono
Kai xal bi khonik t'avel te skipil.
4Baro Del, muřo Del! te kerdem kudia,
T'avela bezex ande muře vast,
5Te kerdem nasul kudaleske kai sas lašio mansa,
T'avelas ke lem intaino pa kudo kai hamisailas pe mande,
6Ke o dušmano te našel pala mande ai t'astarel ma,
Ke t'ičarel tele muřo traio,
Ai te peravel muřo vestimos ande e kišai!
7Ušti, o Baro Del! ande tjiri xoli,
Ušti pe e xoli muře dušmanonge,
Ušti te skipis ma, de ordina jekh kris!
8Ke e kumpania le narodoski avel krugom tutar!
Ankli opral pa lende karing le thana kai si vazdine!
9O Baro Del del kris le narodon;
De ma kris, o Baro Del!
San si muřo čačimos ai san či sim došalo!
10Getosar e xitria katar le nasul,
Ai zuriar kon si vorta,
Tu kai zumaves le ile ai le brebiski, Del vorta!
11Muřo fedevo si ande muřo Del,
Kai skipil kudalen kai lengo ilo si vorta.
12O Del si jekh vorta krisinitori
O del xoliavol ande sako vramia.
13Te na o nasul te či keil pe, vo skutsol peski xanřo,
Vo lašiarel peski sulitsa, ai tsirdel la;
14Vo tradel pe leste le sulitsi merimaske,
Vo kerel t'aven leske sulitsi phabarde.
15Eta, o nasul lašiarel o nasulimos,
Vo del pe godji ka e bezex, ai vo kerel o khanči.
16Vo putrel jekh groapa, vo hunavel la,
Ai vo perel ande e groapa kai vo hunadias.
17Leski bezex perel pe lesko šero,
Ai leski xoli bari vulel pe lesko čikat.
18Me luvudiva le Bare Devles pala leski kris,
Me gjilabava o anav le Bare Devlesko Mai Vučo.
